uhinen hizkuntza

PROGRAMA:

ZAZPI KALE KULTUR TOPAGUNEA


• Bilboko zazpi kaleak kultur sorkuntzaren topagune izango dira ekainaren 16an, larunbatez
• Goiz eta arratsaldez kultur eskaintza oparoa egongo da, euskaraz
• Ekimenak euskara elkarteek urte osoan egiten duten eskaintzaren erakusgarri izan nahi du
• Topagunearen 10. urteurrenaren ospakizunen barruan kokatzen da ekimena


Ekainaren 16an, Bilboko Zazpi Kaleak euskarazko kultur sorkuntzaren topagune bihurtuko dira. Euskaraz egiten den kalitatezko kultur sorkuntza oparo eta anitza dagoela erakutsi nahi du Topaguneak kalean, berezko kulturgunea den Bilboko Zazpi Kaleetan.

Ekainaren 16an goiz eta arratsaldez izango dira emanaldiak Bilbon, zazpi gunetan banatuta. Goizean Plaza Berrian haurrei zuzendutako tailer eta jokoekin batera musika izango da. Arratsaldean, sei eskenatokik eta kale antzerkiak beteko dituzte Bilboko kaleak. Sei eskenatokiotan haurrentzako eskaintza, bertsolaritza, musika, literatura, dantzak eta antzerkia uztartuko dira.

Topaguneak 10. urteurrena ospatzen du aurten, eta ekimen hau ospakizun ekitaldien artean kokatzen da. Topagunea Euskara Elkarteen Federazioa 1997an sortu zen, eta Araba, Bizkaia, Gipuzkoa eta Nafarroako 90 Euskara Elkartek osatzen dute. Elkarteon zein Federazioaren beraren helburua euskararen erabilera sustatzea da. Horretarako, hainbat esparru lantzen dituzte, hala nola haur eta gazteen aisialdia, kulturgintza, tokiko hedabideak, mintzapraktika, entitateak euskalduntzea, sentiberatzea…

Euskara elkarteek eta Topaguneak hamar urteotan antolatu duten kultur eskaintzaren erakusgarri izan nahi du Bilbon antolatutako ekitaldiak. Horrela, formatu txikiko kultur ikuskizunez osatutako Kultur Errotak hamargarren edizioa betetzen duen honetan Topaguneak kalera atera nahi ditu normalean areto itxietan egin ohi diren emanaldiak. Hamar ediziotan 1.300 emanalditik gora antolatu dituzte euskara elkarteek Kultur Errota zirkuituaren baitan.

Ekainaren 16ko ekitaldia antolatzeko Bilboko Udalaren babesa eta BBK eta Metro Bilbaoren laguntza izan du Topaguneak.









Eguneko programa ondokoa izango da:

Goizeko 11,30etatik aurrera, Plaza Berrian:
• Puzgarriak eta tailerrak, Txatxilipurdi eta Txantxikuren eskutik
• Xilipurdi taldearen eskutik Gaur Jaia ikuskizuna

Arratsaldeko 5,30etatik aurrera:
• Plaza Berrian, haurrentzako ikuskizunak
o Alain magoa
o Kiki eta Koko pailazoak
o Zirika Zirkus

• Unamuno Plazan, musika:
o Piztiak
o Txuma Murugarren
o All Jazz Era

• Posta kalean, musika:
o Malatu
o Maixa
o Morau

• Zamudioko atarian, antzerkia eta bertsolaritza:
o La Resisstens taldearen Bräkala ikuskizuna
o Zazpi Astoren Gainean bertso eta musika

• Santiago Plazan, antzerkia eta dantza
o Ane Monna, Oskola eta Karramarroi, Amama Pantxikaren Altxor Ezkutua lanarekin
o Erdizka Lauetan

• Bidebarrieta kalean, literatura eta musika
o Mugaldekoak
o Mikelazulo