ueu365

Gaur egun, terapia osagarriak gero eta indar handiagoa hartzen ari direnean, oso zaharra den terapia bati buruz hitz egiteari oso interesgarri deritzogu. Valentziako Bicorp herrian dauden historiaurreko margoek adierazten digute gizakia gutxienez 8000 urtean erleekin kontaktuan egon dela. Garai haietatik, eztiaren, polenaren, propoliaren, argizariaren eta pozoiaren onurak izan ditu gizakiak. Ikastaro honetan erleen ekoizkinak nondik datozen, nola sortzen diren, nolako konposaketa biokimikoa duten eta zein erabilera terapeutiko dituzten ikusi eta ikasiko dugu.Apiterapiak oso emaitza onuragarriak eskaintzen ditu eta gainera epe ertain eta luzera ez du bigarren mailako eragin kaltegarririk; hori dela eta, gero eta erabiliagoa da.

Ikastaro honen helburua Apiterapia zer den, zeintzu produktu, nola eta zertarako erabiltzen diren azaltzea izango da. Arlo honetan egindako azken ikerketa-lanak ere azalduko dira, biokimika, farmakologia eta medikuntzari dagozkienak.

Ikastaroa 12 ordutakoa da, 2 egunetan gauzatuko da, Baionan.

Merleau Pontyk dioen bezala, sexualitatearen eta giza izaeraren artean harremana dago, sexualitatea da gure izate osoa, izaera horrek jaiotzetik hil arte iraungo du, hau da, bizitza osoko prozesua. Izaera horrek aldaketa ugari izango ditu gertaera ezberdinen eta gizartearen eraginez. Jaiotzez, naturaltasuna, jakin-mina, plazerraren bilaketa... nagusitzen badira ere, nerabezarotik aurrera eta gure gizartearen moral sexuala dela-eta, norberak bere mugei, lotsei, beldurrei... aurre egin beharko die.Ikastaro honen bitartez, norberak prozesu hau albait hobekien bizitzeko aukera zabaltzea dugu helburu.

Ikastaro praktikoa da, talde dinamikan oinarritutakoa, Banakako lanak, talde lanak, elkarrizketak, jolasak eta ariketa praktikoak uztartuko dira.

Sormena lantzeko ikastaroa da hau. Ikus-entzunezkoetan, irudiak lehentasuna du soinuaren gainetik. Irudi batek mila hitzek baino gehiago adierazten omen du.

Eta zergatik ez soinu batek?

Irudirik gabeko film bat egingo dugu ikastaro honetan. Horretarako soinuaren adierazpen-baliabideak landuko ditugu, baita Europan zehar egiten ari diren irrati-artearen proposamenak ezagutu ere. Praktikan, teknologia berriez baliatuta, istorio bat azaldu beharko du ikasle bakoitzak, 5-10 minutukoa, eta, ondoren, guztion eskura jarri webean.

Ikastaroa 2 egunetakoa izango da, uztailean, Baionan.

Antzerkilari, dantzari, zuzendari... eta gorputza eta akzio eszenikoaz interesa duten guztiei zuzendutako ikastaroa izango da Baionan, uztailak 9tik 13ra.

Kantua gurekin bizi da. Denok abesten dugu eguneko uneren batean, edo bertzerik gabe musika entzuten dugu. Irratian, telebistan, autobusean, etxean, nonahi entzungo ditugu kantuak.

Baina ikasgelan? Kantuak entzuten al dira eskoletan? Abesten al dugu ikasgeletan?

Gure proposamena kantua ikasgelara helaraztea da aipatuko ditugun hainbat arrazoirengatik. Alde batetik, hizkuntza den aldetik, euskara ezagutzeko, aberasteko, indartzeko, ahoskatzeko, ulertzeko eta ikasteko. Bertzetik, kantua tresna dinamiko ezin hobea delako hainbat helburu jorratzeko.

Azkenik, hori dena gutxi izaki, lanean ari garelarik gozatzeko ere balio du.
Kantatzen ez duenak zorionik ez omen du, eta konponbide erraza du horrek: Kanta dezagun!!!!

(ikastaroa Baionan izango da, 2 egunez)

Arkeologiaren inguruko ikasketak sendotzeko asmoz, 2005-2006 ikasturtean UEUk eta Aranzadi Zientzi Elkarteak elkarlanean Arkeologiari buruzko Ikastaro Praktikoa antolatu genuen. Ikastaroaren balorazio oso positiboa egin ostean ikasturte honetarako, 2006-2007rako, “Historia, Ondarea eta Oroimena” izenburupean hiru ikastaro antolatu ditugu. Horietatik NAFARROAKO ERRESUMAREN HISTORIA ETA GAZTELUAK ikastaroan matrikulatzeko garaia iritsi da.

Iazko ikastaroaren arlo praktikoa Amaiurko gazteluan burututako indusketa arkeologikoek osatu zuten.
Barrura begira, indusketa horiek ikasleengan eragin handia izan zuten. Horrela, apunteetatik ikasitakoa “in situ” ikusteko aukera izan zuten, bertan egindako lanak formazioaren alde teknikoa eta humanoa- bai talde lanari dagokionez zein herritarrekin harremanari dagokionez- asetuz. Kanpora begira, indusketek oihartzun handia izan zuten, Nafarroako Erresumaren Historiari eta Gazteluei buruzko jakinmina geroz eta zabalagoa eginez.

Aranzadi Zientzi Elkartea eta UEUk antolatutako ikastaro honek hasitako bideari eutsi eta jakinmin hori asetzeko asmoa du.

Horrela, ikastaroaren alde teorikoa online izango da eta indusketak, 15 egunez, Amaiurren.

Euskalgintzaren unibertsoak EUSKARA hitza letra larriz idatzi ohi du betidanik. Hizkuntza gutxiengotu eta jatorri erabat berezikoa izatearen ondorioz edo, euskal hiztunek ez dute nolanahiko erantzukizuna beren kontzientzien buruhausterako: hizkuntza zahar honen biziraupenaz arduratzea eta bere osasun ona bermatzen ahalegintzea gizarte-baldintza erabat zailetan.

Euskalgintzaren ohiko ikuspegietatik harago -eta berauen ekarpena ezinbestekoa izan dela aitortuz- euskararen merkatu-balioaz hausnartzea da jardunaldi hauen helburu nagusia, horretarako sektore anitzetako profesionalen azterketa eta iritziak aurkeztuz eta trukatuz.Gainera, euskararen inguruko hausnarketarako behatoki baten beharraz hausnartu eta ikerketarako ildo berriak azaltzea dugu bigarren mailako helburu.

Bi egunetako jardunaldi hau euskalgintzan murgildutako profesional eta militanteei, marketin eta komunikazio alorretan interesduneei, soziologia eta merkatu-ikerketen teknikak ikasten ari diren ikasleei eta, oro har, euskararen egoeraz kezkatuta dagoen edonori zuzenduta dago.

Jardunaldia Eibarren burutuko da, uztailaren 12 eta 13an.

Softwarearen lokalizazioa itzulpenetik harantz doa. Hitzak itzultzeaz gain beste datu eta metadatu asko egokitu behar dira: datak emateko eredua, esaldien kokapena bete beharreko eremuekiko...Azken urteetan arrakasta handiz lokalizatu dira hainbat produktu euskarara. Produktu itxiak (Windows edo MSOffice) zein irekiak eta libreak (Linux, OpenOffice edo Mozilla), instalatu beharrekoak edo zerbitzari batean dabiltzanak (google edo WordPress).Lantegi honetan hainbat pertsona ibili dira, enpresen ardurapean (Elhuyar, UZEI, CodeSyntax...), komunitatetan (Librezale, EuskalGNU...) edo maila pertsonalean.

Lan horretan aritzeko ezagutza zabaltzea zein egondako esperientziak konpartitzea dira ikastaroaren helburuak.

Ikastaroa 3 egunetakoa izango da, Eibarren.

Gaur egun, gero eta arlo gehiago dira datu espazialak beren eguneroko lanetan erabiltzen dituztenak: hirigintza, baliabide antolaketa, katastroa, geologia, ingurumenaren kudeaketa, merkatu azterketak... Espazioarekin zerikusia duen edozein daturen tratamendua eta irakurketa, taulen bidez barik, mapa tematikoen bitartez egiteak lana zeharo errazten du.

Ikastaro honen helburua proiektu ezberdinei aurre egiteko GIS libreek duten gaitasuna frogatzea da. Horretarako, eskura daitezkeen GIS Libre (GL) ezberdinen artean, euskaraz erabil daitezkeen 2 balioztatzea erabaki da: Kosmo-a eta Gvsig-a.

Historia alorretik abiatuta, oso ezezaguna da II. Mundu Gerran nazismoak islamismoarekin eta musulmanekin izan zuen jarrera eta elkarlana. Ordutik hasita eta sionismoaren sorrera eta garapena kontuan izanik hiruki bat izango genuke aztergai. Aurten Iranen Holokaustoari buruzko jardunaldiak burutu zirenean polemika handia sortu zen. Errebisionismo neonazia indartzeaz gain sionismoarekiko eraso zuzena Iraultza Islamiar paradigmatikoenetik.

Zein kontraesanetatik abiatzen da aipatutako elkarlana; zeintzuk dira aldagai historikoak eta ideologikoak? Bestalde, sionismoa beste muturrean dagoen logika ideologikoa besterik ez da? Parekotasunik al da? Eta atzeraelikadura-prozesurik?

Egun nazioartean protagonismo zuzena duten zenbait aldagai ideologikoren dinamikak aztertzea eta hortik sortu daitezkeen parametroen bitartez nazioarteko zenbait gatazka eta harremanen inguruko hausnarketa egitea da ikastaro honen helburua.

IKASTAROA EGUN BATEKOA IZANGO DA, UZTAILAREN 11AN, EIBARREN.

Hiri bati buruz hitz egiten dugunean, oro har, inguru fisiko jakin batekin, bizilagun askoko, eta erdigune bat eta periferia dituen egitura batekin erlazionatzen dugu, leku batean oinarrituta baitago. Horregatik hiri horiek nolakoak izan diren aztertzeko historiako zenbait garai aukeratu dira.

Bestalde, ideiak trukatzeko eta bideratzeko tradizio luzea duten espazio bereziak dira hiriak, bertan leku garrantzitsua dute kulturak eta arte adierazpideek. Horrekin aipatu nahi da espazio horietan gorde izan diren artelanak eta horrekin batera euskal hiriaren irudia literaturan ere eskaini nahi dela.

Baina, gaur egun eremu urbanoak etengabe aldatzen ari dira, oro har, lurraldeen interpretazio berri bat sortzen ari da. Horregatik, eremu zabal horien etorkizunari buruz edota etorkizunari begira, horiek bultzatzeko egin daitezkeen proposamenak eman nahi dira.Testuinguru horretatik abiatuta euskal hiria hainbat ikuspegitatik aztertuko da: historia, artea, literatura, arkitektura... Historiaren eta gaurko errealitatearen ezagutzatik abiatuta eraikitzen delako etorkizuna.

Ikastaroa 30 ordukoa izango da, Eibarren.

Azken urte hauetan zenbait ikerketak erakutsi dute GIB/HIESaren transmisioa emakumeengan errazago gertatzen dela; horren arrazoia bio-psiko-soziala dela erakusten dute eta oinarrian dauden zergatiak aztertzea beharrezkoa da, arazoari aurre egiteko estrategiak diseinatzeko. Ondorioz, helburua da emakumeak emakume izateagatik GIB/HIESarekin duen harremanaz hausnartzea, bere errealitatea hurbilagotik ezagutu eta ulertu ahal izateko; horrek eguneroko eginkizunak erraztuko dizkigu, martxan jartzen ditugun jokabide eta estrategiak egokiagoak izango direlako.

Tailer hau egun batekoa izango da, Eibarren, uztailaren 3an, eta GIB/HIESarekin harremanetan dagoen edo interesa duen edozein pertsonari dago zuzendua.

Garai berri bat bideratzeko asmotan, belaunaldi arteko harremanak eta gogoetak bultzatzeko helburuarekin antolatu da Bertsolantegia.Bertsolaritza eta bertsogintza bere horretan bakarrik landu gabe, bertsoa eta beste arte diziplinen arteko erlazioak bultzatu eta sendotzeko foroa landu nahi da bertan.

Goi-mailako adituekin eta eztabaida-foroetan oinarrituta, bertsolaritzaren eta kulturgintzaren inguruko gogoeta egitea da ikastaroaren helburua. Bertso-eskoletako gazteentzat, bertsoaren magian sakontzeko aukera emateaz gain, transmisiorako gune bilakatzea, adin desberdinetako bertsozale eta euskaltzaleen elkargunea izanez.

Udako iakstaroen barruan eta Eibarren izango den ikastaro honen helburua da, alde batetik, psikomotrizitate praktikak hezkuntzan izan dezakeen aplikazioa ezagutzea eta praktika honek umearen heldutasun neurofosiologikoan eta psikologikoan eragin dezakeen onura aztertzea, eta bestetik, behatzea nola umeak eraldatu dezakeen bere adierazpen psikomotorea harremanean eta komunikazioan .

Web 2.0 hemen jardunaldiaren jarraipen estua egin zen sustatu.com albistegian, mutilmedia.com eta kateitxik arutz blogetan. Lagun geldiezin eta nekagaitzen kronikatxoak jaso eta laburpen eta estekak biltzen saiatu gara. Askok egon nahi bai, baina ezin: karrajua, esate baterako. Mila esker, denei.


- web 2.0 sarrera. Testua. Joxe Arantzabalen bloga: faroa
- Interneten izaera aldatzen ari diren formatu eta mikroformatuak. Gorka Julio: mikromundua, teketen
- Euskara interneteko 36. hizkuntza. Garikoitz Araolazaren bloga


- euskajakintza:2.0 irakaskuntzan. Maite Goñi. Euskaljakintzaren bloga. IKTeroen bloga
- TOLOSALDEA eta pantailaren atzealdeko estrategia. Iñigo Balerdi
- Zabaldu.com albistegi kolektiboa. Arkaitz Zubiaga
- Tagzania eta blogak: bi adibide praktiko. Josu Azpillaga (Tagzania, blogak.com)

- Ikasys. Naiara Maya eta Ainara Urrutia
- IMK: Itzulpen memoriaren komunitatea. Ibon Aizpurua
- CorpEus eta EusBila, amarauna euskarazko corpus erraldoi gisa kontsultatzeko tresnak. Igor Leturiaren bloga: e-gor
- Matxin: gaztelianiatik euskarara itzultzeko teknologia software librean. Aingeru Mayor eta Mikel Lersundi. matxin.

- Euskalerria 2.0. Iratxe Esnaola
- Web garapenaren arinerako tresnak: AJAX, Ruby on Rails eta MVC paradigma. Jatsu Argarate

Mahai ingurua:
- Internet 2.0 hemen eta munduan
    * Aitor Soroa
    * Eneko Astigarraga. prospektiba
    * Patxi Gaztelumendi

(besteren bat baduzu, erantzun eta sartuko dugu)

Maiatzaren 10ean Donostiako Teknologi Elkartean egingo den IEB07 "Web 2.0 hemen" jardunaldira joateko AUTOA KONPARTITZEKO interesa badaukazu,  hemen duzu aukera.

Berri honi erantzunez egingo dugu elkartrukea, modu erraz eta argian egiteko arau sinple batzuk jarri ditugu:

KOTXEA DAUKAZU...
kotxean joango zara eta gastua konpartitzeko eta bakarrik ez joateko norbait zurekin eramateko prest zaude, honela egin:
- erantzun berriari, eta izenburuan adierazi: AUTOA ERAMANGO DUT - eta nondik irtengo zaren.
adibidez: AUTOA ERAMANGO DUT - GASTEIZ

KOTXEA BEHAR DUZU...
kotxerik ez daukazu eta garraio publikoaren ordez gustora joango zinake norbaitekin, honela egin:
- erantzun berriari eta izenburuan adierazi: AUTOA BEHAR DUT - eta nondik irtengo zaren.
adibidez: AUTOA BEHAR DUT - GASTEIZ

Ez ahaztu erantzunean kontakturako modu bat jartzeaz!
posta elektronikoa edo telefono bat, zure esku!

Hemendik aurrera zuen esku!

1 - Hainbeste desoreka (despertsonalizazioa, autoestimazio eza, elikadura-arazoak, naturaren kontrako eta erasotzaile diren metodoak erabiltzeagatik osasunaren galera, eta abar) sortzen dituen gaurko estetika-eredu diktatorial eta estandarizatuari aurre egiteko, irizpide askea, duina eta osasuntsua bultzatuko dugu ikastaro honetan.

2 - Azalaren egitura, ohiko arazoak eta nola sendatu ezagutuko dugu.

3 - Gure gorputza zaintzeko naturak duen indarra ikusiko dugu. Beraz, Terapia Natural desberdinak erabiliko ditugu.

4 - Elikadura Ortomolekular berriaren oinarriak aztertuko ditugu eta ikasle bakoitzak IOMET Profil Bionutrizional (Ionic Mineral Enzymo Therapy) pertsonala izango du. Horren bidez, bere desoreka mikronutrizionalak  ezagutuko ditu eta osasuna berreskuratzeko aholku makro eta mikronutrizionalak jasoko ditu.

5 - Ikasle bakoitzak 10 Erremedio Natural pertsonalizatu egingo ditu.

Helburua Bitartekaritza Familiarrera hurbiltzea da; honetarako helburuak eta aplikazio eremuak aurkeztuko dira eta prozesuaren etapa desberdinak landuko dira. Prozesuan zehar erabili daitezkeen berri emango da, bakoitza noiz, nola eta zertarako erabil daitekeen azalduz. gain, prozesu honen ardura izango duen bitartekariaren ezaugarriez hausnartuko da, ezaugarri horiekin lortu nahi dena azalduz.

Ikastaro honekin ikasgeletan entzundako hainbat kontzeptu teoriko gure egunerokoan txertatu nahi dugu. Seguru asko kimikarekin estuki lotutako aurreiritziak honelakoak izan daitezke: zikina, kutsatzailea. Gure ikastaro honetan kimika garbitzeko ere erabil daitekeela aditzera eman nahi dugu era aplikatu batean.

Aurreko urteetan bezalaxe, ikastaroan zabalduko den informazioa, hitzaldiak eta mahai-inguruen alde garrantzitsuenak web orrian eskegiko dira.

Euskal Herrian aurrera eraman den eta eramaten den mugimendu fenimistaren nondik norakoen berri ematea da ikastaro honen helburu nagusia. Feminismoak, bai historian eta bai gun ere jorratu dituen bideak, erabili dituen estrategiaketa aldakrrikapenak jendartean txertatzeko zein lan egin duen ikustea da helburua.
Mahai-inguruen bidez emango da ikastaroa, honela informazio-trukaketa dinamikoagoa eta biziagoa izango delako. Mahai inguru bakoitzean hiru aurkezpen egongo dira, ondoren eztabaida eta inpresioak elkartrukatzeko tartea.
Informazio gehiago UEUren web gunean.