Tximintx elkartearen bloga

Atzo Derion lehendabiziko aldiz Film Laburren emanaldia izan genuen, guk antolatuta. Eta ez hori bakarrik. Historian lehen aldiz, film baten mundu mailako estreinaldia Derion izan zen. Horra hor Tximintx elkartearen ekarpena.



Loturak: Ane Muñoz. Mundu mailako estreinaldia, non eta Derion (Durango, Santurtzi eta Irunen ere bai). 20 minutuko filma, labur egin zitzaiguna. Barregarria, ondo filmatua eta, gainera, pentsarazi egiten dizuna. Familiarekiko loturak, apostuak, gizonen egoskorkeriak (emakumeena ez, gizonena), toka zaharra eta ardoa. Oso gustura ikusita. Gehienek onena izan zela aipatu zuten amaieran.

Sarean: Asier Altuna. Bost minutu eskas, itsasoa eta ur geza. Oso gogorra da, latza, baina errealitatea ere latz-latza da.

Xoxoak beleari ipurbeltz: Ozkar Galan. Oso film freskoa iruditu zitzaigun. Gainera, amaitu arte ez da oso ondo ulertzen, baina entzutekoak izan ziren amaieran izaniko barre zantzoak. Ona, anekdota polita. Bigarren esangurak ere bilatu ahal zaizkio, inkomunikazioa, gizarte harremanen azpian dagoen biolentzia, ...

Osaba Jaxinto: Iñaki Beraetxe. Film iluna, burutik ondo ez gaudenontzat egina. Baserrietako giroaren gainbehera, bakardadeak eragiten dituen erokeriak, inkomunikazioa, baina horri kontrajarriz, sentiberatasuna, xamurtasuna, maitasuna. Gogoan hartzeko moduko filma, bai horixe.

Midori: Koldo Almandoz. Seien artean arraroena eta, oro har, egon ginenok gutxien ulertu genuena. Amaieran jendeak galdetu zuen: zergatik dago kartzelan? Ez, ez dago kartzelan, tenpluan baizik. Ulertzeko zaila, oso orientala. Ez gaude ohituta mota honetako filmak ikustera eta nabaritzen da.

Bilintx: John Andueza. Emanaldia amaitzeko ondo aukeratua. Happy end, xamurtasuna, ezinduek gizartean duten arazoak kaleratzen dituena, ... Polita da, goxoa.

Eta, horren ostean, txalo zaparrada. Oztopoak oztopo, emanaldia egin egin genuen eta gustura. Datorren urtean gehiago?