Tximintx elkartearen bloga

"Derioztarren euskara" izeneko liburua argitaratu berri du Tximintx euskara elkarteak. Liburua egiteko sei ikertzailek, Iñaki Gaminderen gidaritzapean, hainbat derioztar zahar elkarrizketatu dituzte, Derioko berbakeraren ezaugarriak ateratzearren. Mamia liburuan agertzen da.

Libururako Tximintx-ek hitzaurrea idatzi egin du eta mezu honetan blogeratuko dugu.

KATEA EZ DA ETEN…

Katea ez da eten, ez, eta Derioko euskalkiak bizirik dirau, liburu honek argi asko frogatzen duenez. Zaharrek erabiltzen dute, bai, baina baita ume eta gazteek ere. Izan ere, liburu honek ez du bildu museoko bitxikeriarik. Ez da ez, irakurle, hautsa pilatzeko makina, ez da ondare hila. Bizirik dago, beraz, eta bizirik mantendu beharra daukagu, zalantza barik.

Katea ez da eten, ez, eta ez da etengo. Gure euskalkia prestigiatzen, lantzen eta zabaltzen jarraituko dugu. Bilketa hau lehen pausoa baino ez da, gure euskalkia berreskuratzeko bidean abiapuntua baino ez da. Gainera, lagunartean eta familian euskalkia batua baino egokiagoa da, bizitasun handiagoa baitu. Esparru hauetan ei du euskarak erronkarik handienetakoa, hortaz, zergatik ez diogu Derioko berbeteari dagokion garrantzia ematen? Zergatik dago, oraindik orain, Derioko berbakera hain desprestigiatua?

Katea ez da eten, ez, ezta hurrik ere. Geroa euskaraz dator Derion, oztopo handiak bidean topatu arren. Nagusitan euskara ikasi duten herritar asko bizi da Derion. Eskolan ikasitako asko ere gure euskalkiarekin harreman gutxi izan dutenak. Horientzat ere, liburu honek ekarpenak izan baditu. Bertako euskaldunek erabiltzen dituzten berezitasunak bereganatzeko aukera ematen die liburuak. Orain euren esku dago erabiltzea.

Katea ez da eten, ez, eta hori gertatu da euskara ahotik ahora transmititu duten gurasoei esker. Hitzaurre honen bidez, Tximintx euskara elkarteak omenaldi xumea egin nahi die Derion belaunez belaun euskara transmititu duten eta transmititzen ari diren gurasoei. Batez ere, garairik zailenetan euren hizkuntza mantendu zutenei. Zuentzat dira lerro hauek, bihotz-bihotzez.

Tximintx euskara elkartea