sentitzen dut baina kontua ez dut ikusten zuk bezain argi; inoiz ere ez dut ikusi normala gaztelaniaz idazterakoan Bizkaia, Gipuzkoa, Araba (eta Nafarroa eta Donibane Lohizun edo Maule) idaztea eta bai Guipúzcoa, Vizcaya, Alava (eta bai Navarra,San Juan de Luz eta Mauleón) hizkuntza horretan beti idatzi izan diren bezala eta bertako Erret Akademiak oraingoz agindu bezala. Eta arrazoia sinplea da: ez dut nahi Gazteleratzaindiak guri euskaraz ari garelarik Madrid edo Frantsestzaindiak euskaraz ari garelarik Toulouse idaztera behartzea. Argudio ergela, beharbada, baina niretzat funtsezko bakarra euskaltzaleei dagokienez; guri ez zaigu tokatzen gureaz bestelako hizkuntzetan ezertaz inongo erabakirik hartzea ez badugu onartzen automatikoki gainerako 6000 hizkuntzetako hiztunek eta haien buruzagi ongi edo gaizki hautatuek gauza bera egin dezaten geure hizkuntzaren zeinnahi hitz eta erregelarekin. Autonomia eta independentzia, baina guztiontzat eta benetakoa, alegia.
joseba lakarra

Gabon Joseba. Neurri batean arrazoia duzula onartu behar dut, hizkuntza jakin bateko toponimoak beste hizkuntza batean zelan ematea, horiekin zelan jokatzea, gaia korapilotsua delako, batez ere estatu berean hizkuntza bat baino gehiago badago. Badira, noski, tradiziozko erabilera batzuk hizkuntza guztietan eta ados nago erabilera horiek ontzat eman behar direla hizkuntza horretan (gaztelaniaz kasu honetan) idazten denean. Eztabaida honek orriak eta orriak eman ditu Espainiako Estatuko probintzia izen batzuk jatorrizko hizkuntzan ofizialtzea ebatzi zenetik.

Baina auzi honetan faktore asko gurutzatzen da eta beste alderdi batzuk hartu behar dira kontuan, nire ustez:

a) zergatik jokatzen den ezberdin euskararekin, Estatuko beste hizkuntza ofizialetako probintzia-izenekin alderatuta.

b)Ezberdindu behar dira alde batetik maila ofiziala, hau da, probintzia batek legalki duen izena (Estatu zentralaren eskumenetan, jakina), eta gaztelaniarako "Gazteleratzaindiak" hobesten duen forma. Nire ustez gauza ezberdinak dira. Baskongadak Espainiako zati diren arte, bederen.

c) Non jartzen den tradizioaren muga erabilera ofizialetan. Esaterako, zuretzat zilegi da Vizcaya gaztelaniaz, baina...Azcoitia?

En fin, galderak...


Dena dela, gai honek, egia esan, ez dit buruhauste handirik sortzen, menturaz itxaropen gutxi daukadalako inoiz Espainiako Estatuak eleaniztasuna modu integratzailean onartzeko, baina tira, ez zait bidezkoa iruditzen "batzuekin bai eta beste batzuekin ez" egin duten gauza arraro hau.

ados, erabat, diozun guztian. Vizcaya-tik Azcoitia-ra beharbada ez da erraza non moztu behar den... moztu behar baldin bada. Zergatik ez dugu lan hori uzten Gaztelatzaindiaren esku (hartu nahi badu)?
joseba