Terrazan, euskaraz!

Getxoko Udalak ez du udal eraikina den Terraza ostatuan euskaldunon hizkuntz eskubideak bermatuko. Izan ere, Ereaga hondartzan dagoen Terraza udal taberna ustiatzeko baldintzetan zerbitzariek euskaraz jakitea ez da derrigorrezkoa, eta balorazio irizpide gisa besterik ez du jotzen. Gainera, 100 puntutik, euskara agertzen den tokian, langileria atalean, 7 puntu baino ez dira banatzen, lau azpi-atal ezberdinetan banatuta: euskara, pertsonalaren jantziak, Europar Batasuneko beste hizkuntzak eta udalerriko eskaintza kulturala zabaltzea. Hots, Udal Gobernuarentzat euskara ez da beharrezkoa eta balorazio osoaren %1,75 baino ez du balio. Hitz bakar batean: lotsagarria. Bestalde, idatzizko harremanei dagokienez, baldintzak euskarari lekua egiten diote baina soilik finkoak diren "errotuluak edota inskripzioak" direnean.

Izan ere, dagoeneko Terraza udal taberna ustiatzeko administrazio baldintzen plegua eta baldintza teknikoen plegua eskuratu ahal izan ditugu. Martxoaren 30ean onartu zituen Udal Gobernu Taldeak, apirilaren 6an argitaratu da laburpena Bizkaiko Agiri Ofizialean eta 15 eguneko epea ematen du eskaintzak aurkezteko. Pleguetan, euskararen aldetik, bi kontu hauek aipatzen dira:

• Baldintza teknikoen 12.4. puntuan: "Saltokiko barnealdean eta kanpoaldean jarri daitezkeen errotuluak edota inskripzioak, modu elebidunean (euskara-gaztelania) jarriko dira, euskarari lehentasuna emanez eta mezu ulerkor baten bitartez".

• Baldintza teknikoen 20 artikuluan, balorazio irizpideetan,1.3 puntuan, honako atalean agertzen da euskara: "Pertsonala: 7 puntu. Puntu honetan kontuan hartuko da proposatutako pertsonalaren euskara gaitasuna, aurkeztutako dokumentazioarekin egiaztatuta; Lokalaren zerbitzura den pertsonalaren jantziak, horien diseinua, estetika, kalitatea eta funtzionaltasuna zehaztuta; Publikoa Europar Batasuneko bestelako hizkuntzetan artatzeko gaitasuna; Udalerriko eskaintza kulturalari buruzko informazioan eta horren hedapenean lankidetzan aritzea".

Bestalde, ekimen honek Joseba Arregi Hirigintza zinegotziari hitzordua birritan eskatu diola gogoratu behar da. Erantzun bakarra apirilaren 6an heldu da. Behean irakurgai duzue hori baita bidali diogun erantzuna ere.

Azkenik, Getxoko Alderdi Popularrak zabaldutako kritikak, euskarari dagokionez, Udalak jarritako baldintzak bezain lotsagarriak dira.

Egoera honetan, hemendik aurrerako pausuak eztabaidatzeko, gaiaren inguruko batzar irekia deitu dugu:

Asteazkenean, apirilak 14, Algortako Aldai patronatuan, arratsaldeko 20:30ean, Paul Bilbaoren "Hizkuntza-eskubideak" hitzaldia bukatutzean.

Hirigintza Arloko erantzuna:

Eguerdi on, Aitor Pinedo naiz, Joseba Arregi zinegotziaren aholkularia.

Lehenengo eta behin bere momentuan egin zenuten eskaerari ez erantzuegatik barkamenak eskatzen diskizuet.  Momentu hartan baldintzako pleguak ixten ari ginen eta hauxe da atzerapen honen arrazoia, hain zuzen ere euskararen presentzia “La Terraza”-ko lizitazioan.

Horrela, pleguetan errotulazio bai gaztelainaz bai euskaraz egitea sartu da euskarari lehentasuna emanez. Honekin batera, baloraketa egiteko baldintzetan langileak euskaldun izatea baloratuko da eta horretarako akreditatu beharko da.

Hauxe izango litzateke zuen eskaerari erantzuna eta honekin batera gaur bertan argitaratu diren pleguak bidaltzen dizkizuet. Bere momentuan oposizioko alderdiei eman genizkien iradokizunak aurkezteko.

Beste azalpenik behar baduzue bai e-mail-ez bai pertsolnalki nahi baduzue erantzungo dizuet.

Agurrak

Hirigintza Arloari emandako erantzuna:

Kaixo, Aitor:

Mila esker bidalitako erantzunagatik. Irakurri ditugu pleguak (erosi genituen aurreko egunean, zure mezua irakurri baino lehen) eta argi gelditu zaigu ez dituztela gure eskaerak betetzen. Idatzita dagoen moduan idatzizko arreta soilik errotulu eta finkoak diren inskripzioei dagokiela ematen du, hots, bokata-kartak eta horrelakoak ez du ematen barne hartzen dituenik.

Baina, larriena da euskarazko arreta eta zerbitzua ez direla bermatzen ostatua den udal eraikin batean, gure hizkuntz eskubideak, Euskara Biziberritzeko Getxoko II. Plan Nagusia eta EAEko Kontsumitzaileen eta Erabiltzaileen Estatutua urratzen direla.

Udalak zerbitzariak euskaldunak izatea derrigorrez ezarri ordez, balorazio irizpide gisa baino ez du finkatzen gaia. 100 puntutik 7 baino ez, gainera, langileria atal osorako. Eta bertan lau kontu daude. Hortaz euskararen garrantzia %1,75 da. Hots, hutsaren hurrengoa.

Hortaz, ulertuko duzunez ez gaude inondik inora pozik –edozein kasuan kontrakoa– atera duzuen pleguekin, terrazan euskaraz baita gure helburua.

Agur bero bat,

Joseba Arregiri, agur t'erdi:

Pasa den otsailaren 18an (orain dela hilabete bat baino gehiago) zurekin batzar bat eskatu genuen   Terrazan Euskaraz ekimena osatzen dugun 47 lagunok. Batzarra, Algortako Zabala kaleko Herritarren Arretarako Bulegoan idatzizko eskaera (7185 idazkia) aurkeztuz eskatu genuen. Zehatz mehatz, "terraza ostatu publikoaren esleipenaz" hitz egiteko.

Ordutik hona, zuzentzen duzun Arlotik inolako berririk ez dugu izan gure eskaeraz, ezta Terrazan Euskaraz ekimeneko testuari kasurik egin diozuenetz. Isiltasuna baino ez.

Gaur, berriz, oposizioko alderdi batengatik, PPtik, gaiaren inguruan nolabaiteko mugimendua dagoela enteratu behar izan gara, inon aurkitu ez ditugun Terraza ustiatzeko baldintza teknikoen agiriak kritikatu dituztela.

Hori dela eta, eskertuko genizuke:

• Zurekin batzartzeko hitzordua ematea.
• Terraza ustiatzeko baldintza teknikoen agiriak helaraztea.

Aurretik zure arreta eskertuz,

Terraza Euskaraz

Kaixo, lagunok:

Hilabete eta piku pasatu da Hirigintza Arloko zinegotziari batzarra eskatu genionetik. Baina, "Getxo partehartzaile" honetan ez omen dago horretarako aukerarik. Erantzun ere ez digute egin politikariek.

Hortaz, gaur positiboki hartu dugu Terrazaren inguruan albisteren bat izatea. Antza euskara baldintzen artean sartu omen dute, PPk gaur egindako kritikengatik uler daitekeena. Hortaz, pozik egon ei gaitezke. Baina dena den, jakina ez dugu ezer, hitz egiten dituzten testuak ez ditugulako ikusi eta, hortaz, ez dago jakiterik guk eskatutakoa betetzen den.

Hona hemen Getxoko PPk zabaldutako testua:

Gaur eguerdian, Joseba Arregi Getxoko Hirigintza zinegotziarekin batzarra eskatu eta "Terrazan, euskaraz" agiria, egiten ditugun hiru eskaerak eta izen-abizenez atxikimendua adierazi duten 47 lagunen datuak aurkeztu ditugu Getxoko Udaleko Erregistro Orokorrak Algortan duen Herritarren Arretarako Bulegoan. Arregiren erantzuna heltzean jakinaraziko dizuegu.

Mila esker zuen sostenguagatik!

Terrazan Euskaraz ekimena

Getxoko Udala Ereaga hondartzako Terraza izeneko taberna publikoa esleitzeko baldintzak prestatzen ari da, testu hau sinatu dugunok berriki jakin izan dugunez.

Hori dela eta, bertoko eta berezko hizkuntzan jarduten dugun komunitate euskalduneko kideok hainbat kontu gogoratu beharra dugu:

• Hasteko, oraindik orain, XXI. mendean, Getxo udalerriko hainbat gune publiko zein pribatutan euskaraz normaltasunez arreta jasotzeko eskubidea ez da betetzen.

• Aurrekoa konpontze aldera, Getxoko Udalak bere “Euskara Biziberritzeko Getxoko II. Plan Nagusia”ren 2008ko otsailaren zirriborroan (planaren azkeneko testua argitaratu bada ez gara topatzeko gai izan), “Administrazioa” atalean “zerbitzu publikoen kudeaketarako kontratuetan” eta “zerbitzuen kontratuetan” hizkuntza irizpideak ezartzea finkatu zuen. Gainera, “herritarrekin harrera euskaraz izatea bermatu, telefonoz zein aurrez aurre eta ahozko kanpo-harremanetan euskararen erabilera bermatzeko bideak jarri (herritarrekin harreman zuzena duten lanpostuetako langileen artean bereziki)” aurreikusi zuen.

• Plan berean, “Lan mundua” atalean, “Lan munduan euskararen erabilera areagotzeko, sektore hauetan egin indarrik handiena: merkataritza-ganbarak, ostalariak, tabernariak, enpresari txikiak eta enpresari- elkarteak, elkargoak eta sindikatuak” proposatu zion bere buruari Getxoko Udalak:

• Bestalde, euskaldunon hizkuntz eskubideen artean daude Euskal Herriko saltoki eta enpresetan harremanetarako euskara erabiltzea eta zerbitzu egokia jasotzea. Adibidez, horrela jasotzen du Araba, Bizkaia eta Gipuzkoarako 2003an onarturiko Kontsumitzaileen eta Erabiltzaileen Estatutuaren 37. artikulua.

• Terraza tabernari dagokionez, orain arte esleipenaz gozatzen zuen tabernaria jubilatu egin da eta oraindik orain taberna kudeatuko duen inor ez dago.

Aurrekoak kontuan hartuta, honakoak eskatzen dizkiogu Getxoko Udalari:

• Terraza taberna publikoa esleitzeko baldintzen artean, zerbitzari guztiak bezeroei euskaraz arreta egiteko kapazak izan daitezen exijitu dezan.
• Terraza tabernako errotulazioa eta idatzizko elementu guztiak, gutxienez euskaraz izatea eska dezan.
• Horrelako baldintzak hemendik aurrerako esleipen publiko guztietan aplikatzea.

Zure sinadura gehitzeko:

• Bidali izen-abizenak eta ENA, EHNA edo DNI terrazaneuskaraz@euskalerria.org posta elektronikora.

(Argazkia: ukberri.net)