semerimendi blog

Benga, arin! Gaur egun, dena egin behar da presaka eta korrika.
Arin! Arinago ezin, ala! Zenbat eta arinago hobe.
Ea ba, azkar! Atzean geratu gura ez baduzu, arin egin behar gauzak.
Gu, bai, gu azkarrak! Gaintzeko guztiek errepiderik azkarrenak, kotxerik azkarrenak, makinarik azkarrenak, eta guk ezin atzean geratu, ostantzean, gureak egin du.
Mesedez, faborez eta arren, Arin! Abiadura da kontua eta denborari minutuak, segunduak lapurtzea gure helburua.

Atzo, AHTren kontrako manifan erderazko bi oihu izugarri gustatu zitzaizkidan: “A 320 la hostia es mas potente” “Teneis el corazon lleno de hormigon”

Erdi katxondeoan esan arren, asko gustatu zitzaizkidan, eta oihukatzen nituen bitartean, buruan Michel Enderen “Momo” liburua izan nuen gira eta bira. Aspaldion buruan darabilt Eusko Jaurlaritzako agintariak, PNV, EA, PP eta IUko agintariak, eraikuntza-enpresetako nagusiak, eta enpresari guztiak orokorrean ez ote diren “Momo” ipuinean agertzen diren “gizon grisak”, denbora aurrezteko aitzakiarekin gainontzeko gizakioi benetan denbora lapurtzen dizkigutenak, haiek ondo eta bapo bizirauteko.

Egunak 24 ordu. Orduak 60 minutu. Minutuak 60 segundo. Horixe da denbora eta, denbora horri segundoak, minutuak edo orduak aurreztea, bizitzari denbora lapurtzea da. Abiadura Handiko Trenarekin bizitzari denbora lapurtu egin nahi diote Eusko Jaurlaritzeko agintariek.

“La justicia esta arrestada por orden de la avaricia.

El dinero que te salva es el mismo que asesina”

Abrazado a la tristeza

Manolo Chinato

Maiatzaren 30ean hasi ziren eta ez dira gelditu. AHT egiteko lanek aurrera segitzen dute Barrondo aldean. Egiten ari diren txikizioa izugarria da.

Ekologia, ingurugiroa, gure lurraldea babestu eta zaindu, garapen jasangarria, parte-hartzea, demokrazia… eta halakoak esaten dituzte behin eta berriro Eusko Jaurlaritzako agintari politikoek, eta euren porlanezko azalean sartu ezinik geratzen dira halakoetan. Baina, aurrera egiteko gure lurralde txikia suntsitu behar dute, antza. Hori kontraesana aurrerapenaren izenan, gure ingurua suntsitu.

Datorren 26an manifestazioa antolatu dute AHT gelditu taldekoek. San Migeletik lanak egiten ari diren Barrondo auzoraino.

Benetan ez dakit nondik datorkidan uztaileko 3. igandean Upoko basaelizako erromeriara joateko ohitura edo tradizioa. Etxean aita Zeberiokoa dut eta ama Zaratamokoa, eta haiek beti aipatu izan didate Upoko erromeria. Aipatu bai, baina ez diet hara joateko ohiturarik antzeman . Jaio nintzen baserrian, berriz, bai, zaletasuna eta tradizioa izan dute Upoko erromeriara joateko. Hortik, beharbada, datorkit niri ere zaletasuna?

Gaur, uztaileko 3. igandea eta eguraldi ona izan izan ez arren, nik dudan ohiturari jarraiki, bertaratu naiz. Eta niretzat horren garrantzitsua den erromeriara joateko tradizioa nire ondorengoei trasmititu nahian edo, alabak nirekin eraman ditut. Jaio zirenetik ia urtero egin dudan moduan, Upora eraman ditut. Hainbeste aukera eskaintzen digun gaur egungo gizartean, berriz, zail ikusten dut guretzat hain garrantzitsuak diren ohiturak ondorengoei trasmititzea.

Upoko erromeria Zaratamo eta Zeberio herrien artean antolatzen den erromeria da. Urte bakoitietan Zeberiok eta bikoitietan Zaratamok antolatu behar izaten ditu. Tradizioari lotuz gero urte batean Zeberiori (elizari, herritarrei???, udalari???????) egokitzen zaio antolatzea eta hurrengo urtean Zaratamori (elizari, herritarrei??, udalari?????????). Aurten, urte bikoitia izanik Zaratamori egokitu zaio. Meza ematera Zaratamoko abadea joan da. Antolatzen inor ez da ibili. Hala edo hola Zaratamoko herritar batzuk (ganaderuek) txoszna modukoa antolatu dute, eta herriko betikook baino ez gara joan. Zaratamoko beste herritar batzuk jaia alaitu beharrean edo, txistuak eta musika jarri dute. Eta Udalak? Lanrroverra eta erositako trikitrixa moduko talde bat baino ez du jarri. Punto. Gainera, eguraldiak ez du lagundu.

Zeberiori egokitzen zaionean berdin antzera, herritarren aldetik oraindino parte hartze eskasagorekin.

Baldintza horietan, nola demontre trasmititu diezaieket nire alabei, Upoko erromeriari diodan atxikimendua? Zelan trasmititu nire alabei zein garrantzitsua den niretzat Upoko erromeriak duen esanahia?

Esan eta egin. Esan zuten Bizkaian AHTren lanak maiatzaren 30ean hasiko zirela, eta egun horretan bertan sartu zituzten makinak gure herrian. Barrondo auzoan lurrak mugitzen hasi ziren, zabortegia izango den inguruan lanean lehenagotik ibili badira ere.

Hain famatu bihurtu den "herriak erabakitzeko eskubidea" AHTren kasuan ez du inolako baliorik. Agintariek ez dute entzun ere egin nahi Euskal Herriko herritarrok zein iritzi dugu proiektu suntsitzaile horren gainean. Haiek erabaki dute gure izenean eta guk nahi eta nahi ez irentsi behar.

AHTren lanak direla eta gure herria zabortegi itzela bihurtuko da. Kamioiak gora eta behera ibili dira. Eta herritarrok zer? Herritarrok isilik eta geldi. Gure herrian ez gara asko mugitzen elizara, eskolara, tabernara edo frontoira joateko ez bada.

 

Gogoan dut institutu garaia. Modu berezian, COUko frantseseko klaseak datozkit burura. Irakasleak etxerako lanak agintzen zituenean, batzuetan, gainerakoei ariketak jartzen zizkien bitartean, niri Ramiro Pinillaren liburuak ematen zizkidan  etxean irakurtzeko.

 

Gogoan badut ere bizpahiru liburu irakurri nituela, zertaz ziren liburuak ez naiz oroitzen.

 

Harrez gero, Pinillaren berri izan dut noiz edo noiz, baina haren libururik ez dut berriro irakurri. Ez dakit zergatik.

 

 

Lehengo egun batean, liburuaren egunean hain zuzen, Bilboko liburu-denda handi batera joan nintzen liburu bat erostera, eta erosi nuen liburuarekin batera, liburu-dendakoek argitaratutako “Cuentos y novelas de  Bilbao” liburua oparitu zidaten. Liburua idazle ezberdinen ipuin eta testu laburrez osatua zegoen.

 

=> Gehiago irakurri!