Sare

Atzo mezu bat idazten hasi nintzen buruan nerabilen kezka baten inguruan. Bi esaldi idatzi ostean: "Ez, ez, Sare. Gaur ez zaude hortaz idazteko moduan" pentsatu nuen. Beraz, han goiko X horri eman nion bi aldiz pentsatzeke eta ohera sartu nintzen.

Gaur ere enuen hortaz jarduteko gogorik, nolabait esateko, momentua pasa zitzaidan atzo, baina nire harridurarako Kalaka izeneko telebista saio berri hortan nik atzo komentatu nahi nizunataz aritu dira, gazteak eta drogak, alegia.

Nire helburua ez zen gaztediak orokorrean drogekin duen egoerataz mintzatzea, baizik eta, nire herrian ikustea beste erremediorik izan ez ditudan zenbait pasadizu komentatzea baizik, kezkatzen nauten zenbait pasadizu.

Telebista saio hori ikusi baduzu, Elgoibarko larunbat arratsalde batetako bideoa ikusteko aukera izango zenuen. Nik ez dut nire burua identifikatuta sentitu inondik inora ere, eta nire moduan askok eta askok ere ez, baina ez dut uste Elgoibarko larunbat arratsaldetako egoera puztu dutenik.

Bideoan 14-17 urte inguruko gazte jendea agertzen zen. Batzuk mozkortuta, beste batzuk porro bat erretzen, norbait speed arrasto bat sartzen, batzuk zutik egon ezinda, beste batzuk kale bazterrean botaka...horrelako zenbait irudi bota dituzte.

Garbi dagoena da ez dela Elgoibarko gaztediaren errealitate bakarra, ezta Elgoibarrera inguratzen den gaztediaren errealitate bakarra ere. Baina larunbatetan Elgoibarren sortzen denaren errealitate bat bada behintzat.

Asko ibiltzen gara Elgoibarren edo "edozein herriko jaixetan" parrandan. Trago bat taberna batean eta hurrengoan ere bai. Porrotxo bat, zigarrotxo bat, komunera osteratxo bat...guztiok inguruan bizi ditugun egoerak dira. Horrek ez gaitu gehiegi harritzen.

Baina niri benetan harritu eta kezkatzen nauena larunbat arratsalde batean Elgoibarko kaleetan adin guztietako jendea pasiaran dabilen artean drogen eraginez sortzen diren liskarrak, egoera penagarriak, indarkeriak, larrialdiak dira.

Adibide bat jarriz, duela hilabete gutxi gorabehera, kalean zehar genbiltzala, 15 urte inguruko neska kuadrila bat bata besteari ileetatik tiraka, irainka, joka, zeharo pasatuta. Neskak ezagunak ziren. 15 urteko neska ezagunak. Kalean zehar adin horretako seme-alabak dituzten gurasoak zerbait konpondu nahiean. Gu, begira. Ni, begira. Aho zabalik begira.

Benetan diotsut, izugarrizko pena sentitu nuela. Beraieri zerbait esateko gogoa ere sartu zitzaidan, baina ez dakit asmatuko nukeen zer.

Ni ere parrandan nenbilen. Nik ere izan ditut 15 urte. Edonork pentsa dezake 15 urteko txorakeriak direla, baina benetan diotsut pena sentitu nuela neska haiek adin horrekin beren buruaren jabe ez nituelako ikusi. Droga ezberdinen menpe ziren eta tristea dirudit burua era hortaraino galtzera iristea.

Borrokak, liskarrak areagotzen omen doaz Elgoibarko kaleetan larunbatetan, eta horrek kezkatzen nau, jende asko baikabiltza ondo pasatu nahiean parrandan, inundik inora liskar bat pairatzeko asmorik eta gogorik gabe.

Drogak inguruan darabilzkigula errealitate bat da. Drogak kontsumitzen ditugula errealitate bat da. Baina ondo pasatzeko balio duten neurriak errespetatzen al ditugu? Ingurukoei ondo pasatzea galaraziko dieten neurriak kontrolatzen al ditugu?

Dibertsioak eskuetatik ihes egiteak kezkatzen nau, nere azalean eta ingurukoenean.