Mizpira

Amaiera ematen hasi beharko zaie udako egun eta gau luzeei. Etorriko al dira udazkenean beste batzuk, baina irailean ditudan bi azterketek arreta pixkat merezi dutelakoan nago.
Hondartza gutxi zapaldu du nire toailak aurten eta etxe atzeko zelaia ere askoz gehiago ez, bainujantziaren marka eskasak salatzen duen bezala.
Ez da uda batere txarra izan, hala ere. Klasekoekin oporrak oso politak izan ziren. Blogosferaren aldetik, Etxekalte eta Hamargarrenean blogarekin animatu zenari aurpegia erakutsi diet eta ohartzen ari naiz nire anonimotasuna eskuen artetik ihes egiten ari zaidala, nork irakurtzen nauen kontrola galtzen ari naiz eta.
Hilabete hauetan bizitza sozialari kasu pixkat egin diot, osasunari oso ondo etorri ez ote zaion batzutan buruan izan arren, goizeko trenetan kilometro dexente erdi lotan pasa baititut pare bat aldiz.
Azkena Bilboko jaietatik bueltan. Ostegunean, Gartzen Elgoibarren Iron Maidenenak egiten ibiliko zen bitartean, klasekoekin finkatu genuen zita han. Dozena bat edo izango ginen. Euria goian-behean, Kerobiaren kontzertuaz nahi adina ezin izan genuen gozatu, guztiontzat bi aterki edukitzeak mela-mela eginda amaitzea ezin izan zuten ekidin. Baina gaua polita izan zen...
... eta uste dut orain niri tokatzen zaidala fitxa mugitzea.