
[Argazkia: Jean Schweitzer].
Hosto denak erantzi eta biluzik utzi gaitu udazkenak.
Hondoratutako itsasontzien paisaia dirudi
batzuetan munduak gure leihotik begiratuz gero.
Behelainoa ere agertu da berriro,
erortzen eta odolusten garen guztietan bezala,
haizeak gaur ere zure aldetik jotzen duen arren
orduko ez dakit zenbat taupadako bolada indartsuetan.
Aintzira urrunetara ihes egindako hegaztiak gara orain.
Hosto denak erantzi eta biluzik utzi gaitu udazkenak,
baina pagoen denbora guztia dugu
urtaro berriak asmatu eta mila koloretan lehertzeko.

Zurekin besarkatu ditudan hirien
postalak biltzen baditut,
ez da nostalgia izeneko hotel batean
gauak pianoaren ondoan igarotzeko.
Noizbait
zure larruaren kolorea izan duten
lekuei begira esnatzeko baizik.

[Argazkia: Wilson Tsoi].
Euriak lekuz aldatutako
itsaso pusketak dira putzuak
tangoen hitzak
bidali gabeko gutunak
apirila managuan
edota marrubiak ezpainetan bezala
gauak zure begietan amaitzen direnetik
bizitzak kolorez aldatutako
eguzki pusketak dira musuak.
Anari, Doctor Deseo, Cesaria Evora, Ive Mendes, Yann Tiersen, Joseba Sarrionandia, Eduardo Galeano, Vincent Van Gogh... Taupadak, malekoi zaharretik...