Landaben Volkswagen (VW) borrokan

Nafarroako Volkswageneko lan gatazka gero eta gehiago ari da larritzen: Forunzaingoak langile bat atxilotu du gaur, atzo foruzainen eta langileen artean izan ziren istiluen harira. Zuzendaritzak, berriz, sei langile kaleratu ditu.

Nafarroako Gobernuak jakinarazi duenez, 40 urteko A.M.C.C. gaur eguerdian atxilotu dute, bere etxean, Garisoainen. Foruzainei eraso egitea egozten diote; zehazki, agintarien aurkako atentatua eta desordena publikoak eragitea leporatzen diote. Atzo Volkswageneko langileen manifestazioan foruzainekin izan ziren istiluen harira egozten diote hori guztia.

Aipatutako iturrien arabera, segurtasun kamerek grabatutako irudietan oinarritu da Foruzaingoa langilea atxilotzeko. Hurrengo ordu eta egunetan langile gehiago atxilo ditzaketela ohartarazi du Nafarroako Gobernuak.

Sei kaleratze

Bestalde, Volkswageneko zuzendaritzak sei langile kaleratu dituela salatu du langileen batzordeak, eta guztiak berehala lanean hartzeko exijitu die arduradunei. Zuzendaritzak kaleratuen "osasun arazoak" argudiatu ditu, baina langileen batzordeak argi du erabaki horrek lan gatazkarekin duela zerikusia.

Hamabost hilabete baino gehiago dira Volkswageneko lan gatazka hasi zela: lan ituna hitzartzeko zuzendaritzak jartzen dituen baldintzak ez ditu onartzen langileen batzordeak. Hala, lanuzte eta mobilizazio ugari egin dituzte azkenaldian. Zuzendaritzak, berriz, Landabengo lantegiari dagokion ekoizpena murriztea erabaki du, eta Polo markako ibilgailua beste leku batzuetan egitea.

(Berria)