Koldotxuren txokoa

Harrituta diot herenegun albiste hori oinarritzen den paper-aren abstract-a irakurri nuelako eta ez zitzaidalako horrenbesterako iruditu.

Hasierara noa, bestela harraro geldituko da dena. Nire tesi-gaia dela eta paper-a ikusi nuen, gabonetarako irakurgai moduan utzi nuena. Bere oso interesgarria da erretrobirus endogenoak ikertzen ditugunontzat, bai egin duen lan-taldea oso potentea delako, bai egindakoak erretrobirus endogenoen garrantzia azpimarratzen duelako. Ez nuen uste, eta horregatik harrigarria suertatu zitzaidala diot, prentsa orokorrera helduko zenik.

Euskal blogosferan batez ere informatikariak daudenez, esan, esango dizuet, ikerketa honen lehen pausua teknika bioinformatikoen bidez egin zela. Ordenagailuak oso erabilgarriak dira biologian. Nik, adibidez, ez dut laborategiko lanik egin, ez dut bata jantzi ezta eskularruak jarri, dena in silico egiten nabil. Algoritmoek, lan automatizatuek eta kalkulu matematiko konplexuak ti-ta batean egin ahal izateak onura handia ekarri diot biologiari. Zaila da bioinformatika edo biologia konputazionalaren definizioak ematea eta ezberdintasunak zeintzuk diren zehaztea. Niri galdera biologikoak ordenagailuen bidez erantzutea dela esatea gustoko dut.

Harira bueltatuz, paper-a irakurri dut eta, egia esan, ez du ihesari buruz ezer esaten. Gaia beste alde batetik doa eta, niretzat, interesgarriagoa. Erretrobirusak birus mota bat dira, ezagunena HIESa sortzen duen GIB-a izanik. Erretrobirusak genero ezberdinetan sailkatzen dira eta euren egituraren arabera bi motetan: sinpleak eta konplexuak. Euren funtzionatzeko (hots, ostalaria infektatzeko duten) modua dela eta ostalariaren material genetikoan txertatuta gelditu daitezke, funtzionatu gabe. Txertatze hau belaunaldietan txertatuta gelditzen bada eta populazioan txertaketa hau orokortzen bada, erretrobirus endogeno bat lortzen da. Orain dela gutxi arte bakarrik erretrobirus sinpleen ondorioz gertatutako txertaketak detektatuak izan dira (gizakiotan erretrobirus endogenoak gure material genetikoaren %8-%10a suposatzen dutela estimatu da). 

GIB-a lentivirus generoko erretrobirusa da, konplexua, eta ostalari primate eta ez-primate duten lentivirusen artean ezberdintasunak daude. Paper honetan bi lentivirus hauen erdibidean egongo litzatekeen balizko erretrobirus bat aurkitu dute lemureetan. Horretarako erretrobirus endogenoak erabili dituzte "fosilak" baliran. "Fosil" hauek ikertuz erdibideko erretrobirus hori nolakoa izan zen estimatu dute. Euren esanetan txertatutako erretrobirus hauek antzinean gertatutakoa jakiteko eta ulertzeko baliogarriak dira, hau da, ez-primate lentivirusak nola aldatu diren primate lentivirusak sortzeko. Eta prozesu hau ulertzeak lentivirusei buruz gehiago jakitea eta ulertzea baliagarri zaigula, oinarria hobeto ulertzeko.

Lemureko erretrobirus endogeno honek HIES-aren konponbidea ekarriko du? Ez. Oinarrizkoagoa den zeozer ulertzen laguntzen du: lentivirusen eboluzioa. 

Esaten den moduan oraina ulertzeko historia ezagutu behar dugu. Eta lan honek, nire ustez, gauza oso interesgarriak usten ditu: erretrobirus konplexuak txeratu daitezkela, lentivirusen sakoneko historioa ezagutzen laguntzen digula eta erretrobirus endogenoak (nire eremura ekarriz) oso erabilgarriak diren elementu interesgarriak direla.

Eguberri on.

Ez da bakarrik erakunde armatuak egindako azken lekuz kanpoko (eta zentzugabeko) ekintza dela eta. Aspalditik datorren zeozer da. Estatuak eta bere kolaboratzaileek eragindako ilegalizazio eta errepresioak ez sinistearen prozesu hau atzeratu zuten, baina, iada, geldiezina zait. Ez dut sinisten Euskal Herriaz eta bere askatasunaz hitz egiten duten pertsonetan (bai eskuinekoak zein eskerrekoak). Ez dut sinisten ezta eurek sinisten dutela ere. Ez sinisteagatik Euskal Herrian sinisteari utzi diot. Ideia (u)topiko oso polita da, munduan gosearekin bukatzea eta gudarik ez egotearen parekoa, hau da, Miss edo Mister lehieketa batean botatzen diren topiko horietako bat.

idatzi dudan bezala ez da soilik the organization-en azken okurrentziaren ondorioa. 

Baita ere Euskadi vs Euskal Herria eztabaida antzu hori, ni ez naiz horretan eztabaida batean sartuko, niretzat biak ala biak zuzenak dira, euskal nazioa eta euskal izaera. Eta purista jartzekotan, Euskal Herriak izan beharko luke izen zuzena (gogoratzen txikitatik abesten genun hori "Zazpi Euskal Herriek bategin dezagun..."). Niri izenak bost, niretzat izaerak du garrantzia. Niretzat eztabaida futbol partida horrek zeozertako balio al duen da; urte askotan joan nintzen eta, hara, urte batzutatik hona ez noa Alderdiaren beste txiringito bat bilakatu dela uste dudalako, euren futboltzokia mantentzeko egiten den diru-bilketa bat. Eta are gutxiago partida horren esannahia edota esaten diren ahohandikeri horiek benetazkoak diren ez dut uste. Beraz, partida horretan sinisteari utzi nion.

Unibertsitatean (UPV/EHUz ari naiz) gertatutakoak ere pisu handia izan du. Nire lasaitasunerako behintzat Esteban ez zen irten eta hori da garrantzitsuena. Baina argi daukat ezker abertzalean gertatutako banaketak (eta, ixilpeko akusazioak) etorkizunean dirudiena baino min handiagoa egingo duela. Ez da logikoa hiru sektoreetako ordezkariek Esteban ateratzea ekidin behar zela argi esatea, ikasleen ordezkariek horrek berdin diola esatea eta ezker abertzalearen posizioa ez bustitzea izatea (ez dut Garak egindako papeloiaz ezer esango). Ez dauka ez hankarik ez bururik. Eta ikasleen ordezkari batzuen jarrera, "gero eta txarrago, hobeto" laburbilduta, negar egitekoa. Azkenean potro eta botere kontu batean bilakatu dutela iruditzen zait, eta nik beste gauza batzuetara geundela uste nuen. Baina, tira, badirudi ikasleon ordezkariak beste mundu batean bizi direla eta mendira joatea oso gogoko dutela. Eurak oso ondo dakite zer komeni zaigun, ideologia berbereko UPV/EHUko irakasle, kontratatu eta langileek kontrakoa uste badute ere. Unibertsitatean egindako egoera barregarri honek, niri behintzat, min asko egin dit. Eta, gainera, lehendik gatoz Ezetzaren blokean sartuta, sektore atzerakoien tranpan jausita eta eureen jokoa jarraituz. Honekin bai, sinisteari utzi diot. Guztiz. Hain nazkatuta nago ze ez dudan uste abertzaltasun, konfrontazio eta burrukaz ari diren horiek benetan euren berbak sinisten dituztela ere. Erdal blogosfera modan jarri zen "cancasuma" saltzaileak direla (euskeraz azpijoko ei da) gero eta argiago daukat. Eta eurak bezala ezker abertzalean dagoen asko.

Eta iada sinisteari utzi banion Durangoko azokak Sastreri (edo Hiru argitaletxeari, berdin zait) egindakoa errematea izan da. Bere garaian zentzua zuen eta oso ausarta zen proposamen bat, eduki barik, hutsa, diru elkartruke ziztrin batean gelditu da. Euskal Herriaren metafora.

Azkenean hori baita geratzen dena: Euskal Herria eduki gabeko lema bat dela, trantsazio ekonomikoak egiteko aitzakia bat, beste merchandising produktu bat, target komertzial bati zuzentzeko erabilitako aitzakia. Guztiz sinisteari utzi diot.

Eta sinisteari utzi diodanez eta benetan sinisten duenari traba ez egiteko nire etxean geldituko naiz. Gaurtik aurrera ez dut harrikadarik botako, ez dut enbarazurik egingo, ez dut ezer egingo, ez dut parte hartuko, ez dut ezer esango. Nahikoa daukat genetika arloan teknika bioinformatikoen bidez tesi bat euskaraz idaztearekin eta bederatzi hilabetetan horrekin bukatzearekin. Nahiko nazio eraikuntza dela iruditzen zait, ekarpen nahikoa iruditzen zait, bakarrik frustrazioa eta nekea sortzen dizkidan beste gauzetan sartzeko, besteei jarraitzeko. Nire etxean geldituko naiz nire etxea atontzen eta kaletik ibiliko naiz inorri traba egin barik (metafora zibernetikoa ere bada). Ez daki/ez du erantzuten bat gehiago izango naiz, ezertan bustitzen ez den horietakoa, ezer sortzen ez duen horretakoa.

Sinisteari utzi diot.

Hori bai, zorionak izatea opa dizuet.

pd: beti diodana, ez hartu egi baten moduan, nire gogoeta da, nire ikuspuntu miopetik, nire esperientziatik. Inork ez dezala txar hartu.