Camille Fauque

Artxiboak: Iraila 2008, 02

2008-09-02

20:38:00, Atalak: Laburpenak, 348 hitz

Zaborrik onena, sortzen ez dena

Hurrengo artikulua irakurri ondoren, egin ezazu testuaren gaineko laburpena, eta kontuan izan gehienez ere 40 hitz eduki behar dituela zure lanak.

Erraustegiak martxan jartzeko asmoak eztabaida sutsua piztu du gizartean. Aldeko eta aurkako iritziak entzun ahal izan dira komunikabideetan, foroetan, kalean eta etxeetan.

Nolanahi ere, oso gutxi entzun da arazoaren muinaz. Alegia, galderak ez luke izan behar zer egin zaborrarekin, erre ala ez erre. Oinarrizko galdera hau da: zer egin zabor gutxiago sortzeko? Ez da galdera hutsala; hondakinen sorrera murrizteko posible da neurri zehatzak eta eraginkorrak hartzea. Adibidez, Belgikan zigortuta dago produktuei behar baino bilgarri gehiago jartzea. Horren ondorioa antzemateko modukoa izango da, bilgarriak etxeko hondakinen herena baitira hemen.

Berez, hiri-hondakinak kudeatzeko planetan ere aipatzen da helburua “zero zaborra botatzea” dela. Hori lortzeko, hainbat neurri ere proposatu dituzte. Besteak beste, enpresekin eta erakundeekin hitzarmenak sinatzeko asmoa dute, erabiltzen dituzten poltsak eta ontziak berriro erabil ditzaten; postontzietara iristen den publizitatea arautu nahi dute; herritarrak sentsibilizatzeko jarduerak sustatuko omen dituzte...

Alabaina, oraingoz ezer gutxi jakin du gizarteak proposamen horien gainean. Ez dira asmo txarrak, inolaz ere ez, baina eraginkorrak izan daitezen bidea jarri behar da. Esaterako, itzultzeko ontziak erabiltzea sustatu nahi bada, aukera eman beharko da. Ez da hain zaila, ezta berria ere, lehen ere egiten baitzen. Hala ere, sistema hori berriro martxan jartzeko, lehenengo ahalegina administrazioak egin beharko luke. Hitz politak ez dira nahikoa.

Antzera gertatzen da berrerabiltzeko eta birziklatzeko neurriekin. Asmoak, onak; bitartekoak, eskasak. Azkenean, kontsumitzailearen esku gelditzen da arduraz jokatzea, baina, aukera emanez gero, jendearen erantzuna uste baino hobea da askotan. Horretaz konturatzeko, nahikoa da birziklatze-tasa zenbat igo den ikustea.

Ekintza horiek guztiak eraginkorrak izateko erraustegiak eraikitzeko bezainbat ahalegin eta diru bideratuko balitz, agian ez lirateke beharrezkoak izango erraustegi guztiak. Edo, gutxienez, ez litzateke hainbeste zabor iritsiko labeetara.

Iturria: Zientzia.net

Hona hemen adibide bat:

Artikulu honen arabera, garrantzitsuagoa da zabor gutxiago sortzeko neurri zehatzak hartzea, erraustegiak martxan jartzea baino. Hondakinen sorrera murrizteko, Administrazioak kontsumitzaileen esku proposamen eraginkorrak jarri behar ditu abian.