FiloBlogia

Ricardo Gómezen bloga

Mezua: Juan Jose Zearreta hil da

2009-11-07

21:43:15, Atalak: Denetarik, Euskara, Euskalaritzaren_historia

Juan Jose Zearreta hil da

Juanjo Zearreta euskaltzain urgazlea eta Euskaltzaindiko kudeatzailea hil da gaur, Autzaganen izandako auto-istripu baten ondorioz. Nire doluminak adierazi nahi dizkiet senideei eta Euskaltzaindiko kideei.

Hona Euskaltzaindiak zabaldu berri duen prentsa-oharra:

Egilea: Prentsa Zerbitzua

2009-11-07

Gaur, azaroaren 7an, Juan Jose Zearreta euskaltzain urgazlea eta Euskaltzaindiko kudeatzailea hil da, auto-istripuz, 62 urte zituela.

Juan Jose Zearreta Urigoitialdekozea Zornotzan jaio zen, 1947ko ekainaren 10ean. 60ko hamarkadaren amaieran hasi zen euskalduntze eta alfabetatze kanpainetan parte hartzen. Hala, 1968-69 ikasturtean Deustuko San Felicisimon euskarazko eskolak sortu ziren, Zearreta talde horretako partaide izan zelarik.

1970ean Lehen Urratsak liburuaren prestaketan jardun zuen, besteak beste, Patxi Elgezabal eta Ricardo Badiolarekin.

Urte horietan lanean zebilen Bizkaiko alfabetatze batzordeko kide izan zen. 1975-76an, herrialde guztietako batzordeak batu eta Alfabetatze eta Euskalduntze Koordinakundea (AEK) sortu zenean, bera izan zen sortzaileetariko bat, idazkari lanak ere bete zituelarik.

1973an hasi zen lanean Euskaltzaindian, Ekonomia arloan, Jose Luis Lizundia orduko idazkariordearen lankiderik hurbilena izan zelarik. 1975eko ekainaren 27an euskaltzain urgazle izendatu zuten.

2003an Euskaltzaindiaren kudeatzaile izendatu zuen Akademiak.

Euskalduntze prozesuarekin loturik beti ere, hainbat lan argitaratu zituen, elkarlanean:

Euskalduntzen (3 liburuki), 1972
Alfabetatzen (1975)
Euskara: Hizkuntza Ariketak (1976)
Euskal Hiztegi Modernoa (1977)
Sortzen - I (1978)
Hiztegia 80 (1980)

Eguneratzea (2009-11-08):

Euskaltzaindiatik beheko mezua heldu zait:

Juanjo Zearretaren aldeko hileta-elizkizuna bihar, azaroaren 9an, astelehenean, izango da, Zornotzan, Larrako Karmeldarren elizan, iluntzeko 19:00etan.

Hil-kapera Euskaltzaindian egongo da bihar, goizeko 9:00etatik arratsaldeko17:00ak arte.

Zabaldu•

Bildu•

Twitter• Permalink-a • 4 erantzun

Erantzunak, Pingback-ak:

Bidaltzailea: Benito [Bisitaria] · http://karrajua.org

Berdin, doluminak senide,lankide eta lagun guztiei.

2009-11-07 @ 23:27

Bidaltzailea: Iruri [Bisitaria]

Doluminak Juanjoren familia eta adiskideei. Goian bego.

2009-11-08 @ 03:48

Bidaltzailea: Pruden Gartzia [Bisitaria]

Zaila da gertutik ezagutu duzun norbaiti buruz idaztea hil berri denean. Baina zerbait idazteko beharra sentitzen dut, batez ere hura zuzenean ezagutu ez zutenentzat edo gutxi tratatu zutenentzat.

Bihotzak gainezka egiten dien pertsona horietako bat zen, dena bihotza, dena sentimendua. Langile porrokatua, era berean, goizetik gauera jo-ta-sua lanean beti, onenak emateko prest beti. Langile ikaragarria, euskalgintza zen haren mundua, euskalgintza bere alor guzti-guztietan, eta beti herrigintza bezala ulertuta, inoiz ez jarrera urrun batetik. Eta euskalgintza ardatz argi baten inguruan egituratuta ikusten zuen, Euskaltzaindia; hari dedikatzen zion bere ahalegin guztiak, gau eta egun, baina haren bitartez, euskarari eta herriari, Euskal Herriari. Hori zen bihotzean zeramana.

Neuk lanean ezagutu nuen. Beti lanean. Beti zen lehena lantokira agertzen, beti azkena alde egiten. Zerurik baldin badago, ziur naiz honez gero lehen lan bilerak egiten hasita dagoela hantxe, honez gero badituela bizpahiru proiektu buruan, honez gero hasi dela lehen harremanak bideratzen...

Goian bego Juanjo. Doluminak familiari.

2009-11-08 @ 14:06

Bidaltzailea: Ricardo Gómez [Kidea]

Mila esker, Pruden, zure hitzak hemen idazteagatik eta gurekin partekatzeagatik. Nik ez nuen Juanjo asko ezagutu eta benetan estimatzen dizut haren langile izaeraz azaldu duzuna.

Asko ezagutu ez nuela esan dut, baina bai izan nuen bere lanaren berri zuzena. Adibidez, Euskalduntzen metodoarekin hasi nintzen euskara ikasten 1978an eta Euskal Hiztegi Modernoa izan zen nire lehenengo euskal hiztegia (oraindik gordetzen dut, noski).

Bestalde, ezin dut ahaztu Joseba Lakarrarren sarrera-ekitaldian neure gurpil-aulkiarekin Arratzuko elizan sartu ahal izateko Juanjok hartu zituen ardurak eta lanak, eta zein ondo bete zituen ere!!

2009-11-08 @ 16:25