FiloBlogia

Gaur El País egunkarian El Roto-ren bineta hau argitaratu da:



Ados zaude binetan esandakoekin? Aldez bai, aldez ez? Guztiz? Batere ez?... Eman zure iritzia beheko inkesta honetan:

Gaur berri txar bat jaso dut: "Euskal idazle zaharrak institutuan ate joka" udako ikastaroa bertan behera geratu da.

Arrazoia da 18 ikasle matrikulatu direla eta EHUko Udako Ikastaroen arautegiaren arabera, 35-40 ikasle da gutxieneko kopurua. Ondorioa: ikastarorik ez hamazortzi ikasle horientzat.

Gero eta gehiagotan zabaltzen ari dira halako irizpideak gure UPV/EHUn, eta hortik kanpo ere bai: hautazko ikasgai bat eman ahal izateko gutxieneko ikasle-kopuru bat, doktorego edo master bat onartzeko gutxieneko ikasle-kopuru bat, graduko titulazio berriak onartzeko gutxieneko ikasle-kopuru bat (eta ez baxua gero!)...

Inbidiaz entzuten diet atzerriko lagun batzuei nola ematen dituzten beren eskolak ikasle bakar bat edo gutxi batzuk dituztelarik ere. Eta ez soilik askoz errazagoa delako ikasle gutxirekin lan egitea, errazagoa haien lana jarraitzea, ikasketa-prozesua behar bezala bideratzea, etab.; inbidiaz baita ikastaro horiek emateko aukera dutelako ere, guri ukatzen baitzaigu.

Boloniarekin edo Boloniarik gabe, ez dut ulertzen ikasle-kopuruak zergatik izan behar duen erabakigarria unibertsitate publiko batean ikastaro bat eman ahal izateko. Gai baten interesa, eta are egunotan askoren ahotan den "praktikotasuna", ezin da neurtu matrikulatzen diren ikasleen arabera.

Utz ditzagun halako irizpide krematistikoak unibertsitate pribatuentzat, erabili nahiko balituzte. Unibertsitate publikoek arras zabalik egon beharko lukete ikasi nahi eta ikasteko baldintza akademikoak betetzen dituzten guztientzat, inolako murriztapen ekonomikorik jarri gabe; ez ikasleei matrikula garestiak ordainaraziz eta ezta ere ikastaroak ikasle gutxi daudelako eman gabe utziz.

Baina, jakina, horretarako unibertsitate publikoak finantziazio publiko duina eta nahikoa izan beharko luke, Eusko Jaurlaritza zekenkerian ibili gabe, aldaketak aldaketa halaxe baitabil oraindik.

Lotutako sarrera:

• Euskal idazle zaharrak institutuan ate joka

P.S.: barka ezazue EHUko Donostiako Uda Ikastaroen loturarik sartu ez badut, baina nonbait atzo 40 bisita baino gutxiago izan zuten eta gaur webgunea erorita dago.

Euskararen eta gaztelaniaren irakurle lanpostu bat deitu da, Birminghameko Unibertsitatean aritzeko. Eskariak EHUko Letren Fakultateko Dekanotzan eman behar dira. Argibide gehiagorako eta inprimakia lortzeko Almudena Oriberekin hitz egin behar da

Hona lanpostuaren deialdi osoa:

IRAKURLE PLAZA BIRMINGHAMEKO UNIBERTSITATEAN


Irakurlearen zereginak: Euskarazko eta gaztelaniazko eskolak ematea,  Filologia Hispanikoko sailaren barruan.

Lanean 2008ko irailean hasteko.

Betebeharrak: Filologian edo Itzulpengintza eta Interpretazioan Lizentziatua. EGA edo horren baliokideren bat duena. Ingelesa jakitea eta informatikan trebatua izatea balioetsiko da.

Birminghameko Unibertsitatean Master/Doktorego ikasketak burutzeko asmoa azaltzen duten ikasleek lehentasuna izango dute.

Ordainketak eta laguntzak:
1.-Eskolen ordainketa Britainia Handiko erregimen ofizialaren arabera: 1.500 € inguru hilero.
2.- Master edota Doktoregoko ikasketak egiteko matrikula gastuak oso murriztuak:  250 £ masterrerako eta 500 £ doktoradutzarako (ohiko matrikula: 1.800 £).

Eskarien aurkezpena:
Eskariak inprimaki ofizialetan eginen dira (I Eranskina, zeina Dekanotzako bulegoetan eska baitakioke Almudena Oribe andereari, deialdiaren iragarpen honekin batera).

Izena emateko epea uztailaren 15ean 13.00etan amaituko da.

Euskaltzaindiak bere Nazioarteko XVI. Biltzarra ezagutarazi du gaur, bere webgunean hari buruzko informazioa eskaintzeko atal berezi bat sortuz. Biltzarraren izenburua hauxe da: "Pirinioetako hizkuntzak: lehena eta oraina" eta Iruñeko Baluarte Batzar Jauregi eta Auditoriumean izango da, 2008ko urriaren 6tik 10era.

Biltzarrean honako gaien inguruko txostenak aurkeztu ahalko dira:

1. Euskararen Historia eta Historiaurrea
2. Euskal Dialektologia eta Onomastika
3. Euskal Literatura
4. Euskararen Historia Soziala
5. Teknologia berriak eta Hizkuntza gutxituak

Txostenak bidaltzeko epea uztailaren 17an amaituko da. Dagoeneko Biltzarraren 1. zirkularra argitaratu da eta bertan informazio xeheagoa aurkituko duzue

Argibide gehiago:

• Euskaltzaindiaren Nazioarteko XVI. Biltzarra: "Pirinioetako hizkuntzak: lehena eta oraina"

Atzo El País egunkariak Carlos Berzosa, Madrilgo Conplutenseko errektorearen artikulu bat argitaratu zuen, "Sí a Bolonia, pero no así" izenburua zuena.

Ez nago ados artikuluan esandako guztiekin, baina hurrengo paragrafo hau letraz letra sinatuko nuke:

Llevamos demasiado tiempo hablando de Bolonia, confundiendo a profesores y estudiantes. Se está dejando pudrir el proceso de reformas por falta de directrices claras. Parte del profesorado se encuentra desmotivado, cuando no enfadado por la burocracia. El proceso de Bolonia es atacado por una parte de los estudiantes y profesores, dificultado por otros desde arriba, y los que lo tienen que aplicar cada vez tienen menos ilusión en él. Se encuentra en verdaderas dificultades para tener éxito.

Lotutako sarrerak:

• Bolognako prozesuan berandu gabiltza
• Espainiako Hezkuntza Ministerioa mugitzen hasi da?
• Oraingo CAP ikastaroaren ordez datorkigunaz
• Bolognari bai, Bolognari ez, baina zein Bolognari?
• Bolognako prozesuari buruzko kezkak manifestu batean
• Ikasleen lan gidatuak bai, baina zenbat ikasle?

Hilaren 3an, Bilboko Liburu Azokak egindako omenaldi baten barruan, Euskaltzaindiak Henrike Knörren omenez argitaratutako liburuska bat aurkeztu zuen.

Bertan, hamabost orrialdetan, Henrikeren biografia laburra, berak idatzitako "Robert Laxalten The Basque Hotel" artikulua, Henrikeren oroipenean bildutako adierazpen batzuk eta ohar bibliografiko zenbait sartu dira.

Liburuska sarean jarri du Euskaltzaindiak:

Henrike Knörr 1947-2008 (PDF)
Lotutako sarrera:

• Henrike Knörr hil da

Unibertsitateko irakasle edo ikertzaile bazara, erraz ulertuko duzu mezu honen izenburua. Ez bestela ere bai, segurki: Espainiako irakasle eta ikertzaileen curriculum vitae-en datubase bakar baten eskariaz ari bainaiz, alegia.

Gaur egun, irakasle eta ikertzaile batek hainbatetan aurkeztu behar du bere curriculuma eta, jakina, beti eskatzen dira datu desberdinak eta beti formatu desberdin batean.

Eusko Jaurlaritzak, ministerioak, ANECAk, UNIQUALek, unibertsitateek...eskatuta, ikerketa-proiektuak eskatzeko, sailaren memoria egiteko, irakasle akreditazioa lortzeko, irakasle edo ikertzaile lanpostu batera aurkezteko, epaimahai baten kide izateko, tesi zuzendaria izateko, ordainsari osagarriak eskatzeko, seiurtekoak eskatzeko... eta beste hainbatetarako curriculumak bete eta bidali behar. Noiz paperean, noiz DOC formatuan, noiz PDFan, noiz sareko datubase batean...

Egoera horren aurrean, azkenean Sevillako unibertsitateko irakasle eta ikertzaileen elkarteak eta lan-kontratudun irakasle eta ikertzaileen enpresa-batzordeak online eskari bat bideratzea erabaki dute, guztiz zentzuzko eta beharrezkoa, haren aldeko sinadurak biltzeko eta, ondoren, azaroarekin zerikusi zuzena duten agintariei bidaltzeko.

Beraz, unibertsitate batean bazaude eta eskariarekin ados bazaude, hemen utz dezakezu zure sinadura:

Por una única base de datos de currículos de investigadores y docentes en España
Mezua idazteko une honetan 1854 sinadura daude.