FiloBlogia

Ricardo Gómezen bloga

Mezua: Koldo Mitxelena Katedraren II. Biltzarra hedabideetan

2007-10-12

20:34:51, Atalak: Hizkuntzalaritza, Filologia, Euskara, Unibertsitatea/Irakaskuntza, Euskararen_historia

Koldo Mitxelena Katedraren II. Biltzarra hedabideetan

Datozen egunetan saiatuko naiz laburtzen, pixkanaka-pixkanaka, Koldo Mitxelena Katedraren II. Biltzarrean etzun ditugun hitzaldi eta txostenak.

Aste honetan ez dut paperezko egunkariak irakurtzeko aukerarik izan eta, beraz, edizio digitaletara jo behar izan dut. Edizio digitaletan hutsuneak izaten direlako eta nik aurkitu ez ditudan artikuluak egon daitezkeelako, biziki eskertuko nituzke ondoko zerrenda osatzeko aipamen guztiak. Orobat, irratian edo telebistan ezer aipatu badute.

Zernahi gisaz, bitartean hemen duzue biltzarrak egunkarietan izan duen isla urri-urria:

Bistan da, erru guztia ez da kazetariena; antolatzaileek eta bereziki EHUko prentsa-bulegoak ere badukete zerikusirik. Baina, guztiarekin ere, iruditzen zait, oro har, Euskal Herrian (bakarrik?) arreta handiagoa ematen zaiela euskararen inguruko albiste sentsazionalista eta txoroei, jarduera eta ekimen serio eta eraginkorrei baino.

Zabaldu•

Bildu•

Twitter• Permalink-a • 4 erantzun

Erantzunak, Pingback-ak:

Bidaltzailea: Pruden Gartzia [Bisitaria]

Agian txoko eta une egokiak dira biltzarrean parte hartutako hainbatek balorazio xumeak egin ditzagun. Neurea:

a) Zorionak antolatzaileei. Neuk parte hartutako saio guztiak oso interesgarriak gertatu zitzaizkidan, programaren "inhumanotasuna" gora-behera.

b) Oso garbi dago euskal filologoen komunitatea heldutasunera iritsi dela, eta euskaraz (bi gauza dira, ez bat). Ezin dut esan "munduko" zientzilari komunitate askorik ezagutzen dudanik baina bai, itxura betea sumatu nuela, berdintsu litzatekeela Gasteizen, euskal filologiaz, eta euskaraz, edo Sidney-en, polinesiar filologiaz, eta ingelesez. Ez da gutxi, kontuan izanik Euskal Filologia, diziplina akademiko gisa, orain dela 30 bat urte fundatu zela, eta euskara, hizkuntz unibertsitari gisa... hortxe-hortxe.

c) Aditu asko eta ikasle gutxi. Hori da nire inpresioa, daturik ez badut ere. Galderak ere formalegiak, akademikoegiak, apika. Nire inpresioa egiazkoa balitz, apur bat kezkagarria irudituko litzaidake. Dena den, urte asko dira unibertsitate mundua kanpotik ikusten dudala, eta agian ohar hau ere inpresionista hutsa da.

Borondate onez egindako oharrak dira, boteprontoan gainera. Baina agian ez da kaltegarria horrelako batzuk ere beste norbaitzuk egitea.

2007-10-15 @ 10:25

Bidaltzailea: Pruden Gartzia [Bisitaria]

Beste inor animatzen ez denez gero, azken puntada emango dut, nire aldetik.

Ricardok dio: "Baina, guztiarekin ere, iruditzen zait, oro har, Euskal Herrian (bakarrik?) arreta handiagoa ematen zaiela euskararen inguruko albiste sentsazionalista
eta txoroei, jarduera eta ekimen serio eta eraginkorrei baino."

Bada, hori, baldarki esanda, seinale ona da, alegia, euskal filologoen komunitate zientifikoak heldutasuna (normaltasuna) erdietsi duela seinale. Zeren, hortik ateratzen da:

a) Komunitate egituratua dela, zeinetan nahikoa garbi dagoen zer den zientzia "kanonikoa" (ortodoxoa, arrunta), zer zientzia "heterodoxoa" (ausarta, ausartegia sarri), eta zer zientzia "ilargitarra". Ez dira horrenbeste urte maila guztiak nahasian agertzen zirenetik.

b) Hori da, ziur aski, komunitate zientifiko gehienen egoera arrunta munduan zehar (hots, mailak, edo zirkuluak, nahiago baduzue, egotea, ez denak nahas-mahas; eta zirkulu horiek erraz-erraz bereiztea).

c) Komunikabideek azken "eraztunari" (ilargitarrei) askoz ere arreta gehiago eskaintzea beste "normalago"-ei baino, esango nuke normala dela munduan zehar (tamalez, esango lukete askok...).

Daitekeen mundurik hoberenean bizi gara, beraz.

Harik eta...

2007-10-21 @ 13:39

Bidaltzailea: Ricardo Gómez [Kidea]

Pruden: "Daitekeen mundurik hoberenean bizi gara" edo, gaztelaniaz esaten den bezala, "mal de muchos... epidemia".

2007-10-22 @ 11:09

Bidaltzailea: Luistxo Fernandez [Bisitaria] · http://eibar.org/blogak/luistxo/

Hedabideengan pentsatzen dugu, informatuko dutela, guk interesgarritzat ditugun gauzez, jendeari ezagutza eta informazioa ematen saiatuko direla, bista apur bat izango dutela kazetariek albistea eta zarata desberdintzen... Ze ilusoak garen.

En fin, Internet daukagu, Ricardo. Ez ditut behar hedabideak, zuk idazten baduzu euskal filologiaz. 15 irakurle izango dituzu, agian. Baina, benetan, zure audientzia ñimiño honek eskertzen dizu lana, nik guzti horien izenean eskertzen dizut.

2007-10-25 @ 09:21