FiloBlogia

Ricardo Gómezen bloga

Mezua: Bibliografia aipamenak egiteko modu bateraturantz

2007-05-05

13:27:23, Atalak: Hizkuntzalaritza, Aldizkariak

Bibliografia aipamenak egiteko modu bateraturantz

Askotan izaten dugu zalantza (batzuek gehiagotan, besteek gutxiagotan) halako liburua edo halako artikulua, halako tesia edo halako eskuizkribua nola aipatu behar den bibliografia zerrenda batean.

Azken bizpahiru urteotan, hizkuntzalaritzazko aldizkarien editore talde bat aritu da hizkuntzalaritzan erabiltzeko estilo orri bateratu baten bila.

Lan-talde honen behin-behineko emaitzak The LINGUIST List web gunean argitaratu berri dira:

"A Unified Style Sheet for Linguistics Journals " (PDF)

Proposatzen dituzten bide batzuk nahiko orokorrak badira ere, bestetan nabarmena da estilo-orria, nagusiki, ingelesez idatzitako lanei buruz pentsatu dela (izenburuetako hitz guztien lehen letra larria izan ez dadila gomendatzean, adibidez).

Ez dakit norainoko arrakasta izango duen proposamen honek, batez ere eremu anglo-saxoitik kanpo; baina oso ekimen beharrezkoa iruditzen zait eta espero dut bide honetatik lanean jarraitu dezatela.

Jakina, halako bateratze prozesu guztietan bezala, denok utzi beharko ditugu alde batera "betiko" ohitura batzuk, eta zaila gertatuko zaigu hasieran aldaketak onartzea. Baina hitzarmen guztietan bezala ere, denbora eta ohitura kontua da, ez besterik.

Zabaldu•

Bildu•

Twitter• Permalink-a • 2 erantzun

Erantzunak, Pingback-ak:

Bidaltzailea: Anna [Bisitaria]

Kaixo Ricardo!

Anna dut izena, Bartzelonakoa naiz eta hemengo Hizkuntz Eskola Ofizialean euskara ikasten ari naiz. Unibertsitatean Filologia katalana ikasten ari naiz, eta lan bat egiteko "nekatu" hitzaren etimologia jakin behar dut... lagundu al didazu, faborez? Nire emaila da annapinedaicireramris@hotmail.com

Mila esker!!! Moltes gràcies!

2007-05-14 @ 16:08

Bidaltzailea: Ricardo Gómez [Kidea]

Kaixo, Anna:

Nekatu aditza mailegua da. Bi aukera daude, Mitxelenaren arabera:

1. Zuzenean latinezko NECARE ('norbait hil, erail') aditzetik etortzea.

2. Neke izenetik eratortzea. Neke, bestalde, latinezko NECEM ('heriotza (batez ere bortitza bada)') izenetik dator.

Espero dut ohartxo hauek lagungarri gertatzea.

2007-05-14 @ 17:12