FiloBlogia

Ricardo Gómezen bloga

Mezua: RIEV aldizkariak 100 urte bete du

2007-04-13

19:09:20, Atalak: Aldizkariak, Urteurrenak

RIEV aldizkariak 100 urte bete du

1907an Julio Urquijok Revista Internacional de los Estudios Vascos aldizkaria sortu zuen, RIEV laburduraren bidez ezagutu ohi dena. 1922tik aldizkaria Eusko Ikaskuntzaren agerkari ofiziala da eta 2005etik artikulu guztiak Interneten daude eskura.

Eta, mendeurrena ospatzeko, Eusko Ikaskuntzak ekitaldi ireki batzuk antolatu ditu, datorren astelehen eta asteartean Donostiako Kursaal Elkargunean izango direnak (egitaraua PDFn).

Halaber, Euskonews & Media agerkari digitalaren 390. alean, ekitaldi horietan emango diren hitzaldi batzuen laburpenak argitaratu ditu:

Ricardo CIERBIDE: "Aportaciones de la RIEV en Lingüística y Filología vascas"
Emilio Xabier DUEÑAS: "La Cultura de la Tradición. RIEV: entre el Folklore... y la Antropología"
Josemari VELEZ DE MENDIZABAL: "Literatur ekarpena RIEV aldizkarian"
Jose Luis LIZUNDIA ASKONDO: "Julio Urkixo, euskalgintza anitzaren ispilu"
Jaione VELILLA IRIONDO: "La presencia del Arte en la RIEV"

Alea osatzen da Gregorio Monrealek idatzitako "Una historia de la Revista Internacional de los Estudios Vascos" artikulu mamitsuarekin, lehenago RIEVen bertan, 46:1 zenbakian, argitaratu zena.

Eguneratzea (2007-04-18):

Sustatun irakurri berri dut Euskomedia Fundazioak webgune berezi bat pretatu duela RIEV aldizkariaren lehen mendeurrena ospatzeko.

Bertan, besteak beste, aldizkariaren historia (Monrealen artikuluarekin lotuz), lan monografiko batzuk (Axularren faksimilea, esaterako) eta artikuluak hizkuntzen eta egile hautatu batzuen arabera bilatzeko aukera zuzena daude.

Zabaldu•

Bildu•

Twitter• Permalink-a • 2 erantzun

Erantzunak, Pingback-ak:

Bidaltzailea: blancatxo [Bisitaria]

Proposatu diguzun ibilbidetxoa egin dut, eta esan behar dut harrigarria dela RIEVeko euskalaritzari buruz hitz egin behar duenak bere laburpenean ez azpimarratzea aldizkariaren "aro klasikoa" edo deitzen diotenaren emaitzarik garrantzizkoena, hartzen duen tamainaz baino ez bada ere, zeina baita euskal testu zaharrak argitaratzea (irizpide eta helburu filologikoekin argitaratu ere), testu horiek zeharo gaitzetsita zeuden garai batean, gainera ("denak erretzea hobe").
Espero dut laburpenaren errua izatea...

2007-04-15 @ 02:43

Bidaltzailea: Ricardo Gómez [Kidea]

Arrazoi duzu, Blancatxo. Zorionez, Goyo Monrealen artikuluan bai aipatzen eta azpimarratzen da euskal testu zaharren argitaratze lana.

Izan ere, 20. orrialdean "la tarea primordial de la RIEV en este campo [=euskal literatura]" izan zela dio. Aurkitu duzun hutsuneari azalpen bat eman nahian, hain zuzen, izan liteke Monrealek euskal testu zaharren berrargitaratzea "euskal literatura"ren esparruan kokatu zuelako gertatzea eta, beraz, Cierbideri "euskal filologia"ren barruan (ere) aipatu behar zela ez bururatea.

Gainera, Velez de Mendizabalek bai aipatzen du kontua, bidenabar baino ez bada ere, "literatur ekarpenari" buruzko artikuluan.

2007-04-15 @ 15:55