FiloBlogia

Agur t’erdi euskalari lankide:

Dakizunez, 1997an izan zen Mitxelena Katedraren I. Biltzarra eta, hainbat luzamenduren ondorioz, 2003an argitaratu ziren bere Aktak. Katedrari izena ematen dion ikertzaile paregabearen 20. urteurrenarekin, sinatzaileok aurtengo urrirako batzar bat deitu nahi izan dugu Mitxelenak bereziki landu zituen ondoko bost iker-lerro hauen inguruan:

1. Euskararen historiaurrea: konparaketa eta berreraiketa.
2. Euskararen historia eta filologia.
3. Dialektologia historikoa.
4. Linguistika sinkronikoa.
5. Lexikografia (sinkronikoa eta diakronikoa).

Antolamenduari dagokionez, gure asmoa da atal bakoitzean txosten gonbidatu bat (60 bat minutukoa) eta bost bat hitzaldi labur (20na minutu) izatea. Txostenetan, honelakoetan ohi bezala, iker lerro horien egoera orokorra, azken urteotan edota Mitxelenaz geroztik izan diren ekarpen garrantzitsuenak edo eginkizun diren azterketak aurkeztea nahi genuke, besteren artean; komunikazioetan, aldiz, delako iker lerro horietarik bateko puntu zehatz bat hartu eta garatzea. Azken hauei dagokienez, gonbidatzen zaitugu hitzaldi proposamenak aurkeztera (izenburua eta folio erdiko laburpenarekin) martxoaren 1erako, Batzordeak ahalik eta lasterrena erantzun eta Batzarraren egitaraua osa eta zabal dezan.

Oraingo honetan Biltzarraren Aktak aurrekoan baino askozaz lehenago argitaratzea segurtatu nahi dugu beren baliagarritasuna areagotzeko; horregatik, urriko testuak akabukotik hurbil behar luke izan.

Diru kontuei dagokienez, txosten gonbidatuak (gehi Batzarraz landako beste gonbidatu bat edo bi) ordainduko ditugu beren hitzaldiei dagokienez; horrezaz landa, onartutako komunikazioen egileen bidaiak ere ordainduko dira eta gustatuko litzaiguke hitzaldiagatik eta (handik gutxira eskatuko zaion) testuagatik zerbait ematea ere: ikusiko.

Zure proposamenaren zain, har ezazu gure agurrik beroena.

Joakin Gorrotxategi - Joseba A. Lakarra - Blanca Urgell