FiloBlogia

Kaixo Ricardo,

Ondoko leku honetan:

http://euskara.wikispaces.com/peru_abarca

Mogelen Peru Abarca eskuizkribuaren 3 orrialde ikusten ahal dira.

Ea zer iruditzen zaizkizun.

Adeitsuki

Josu Lavin

Ondo iruditzen zaizkit. Aspalditik nekien lehenengo orrialdea Wiktionary-n zegoela eta orain hiru ditugu eskura.

Orain, ez dakit zein erlazio duen horrek mezuan iragartzen dudan doktorego tesiarekin edo haren gaiarekin (oso-oso zeharkakoa ez bada behintzat).

Kaixo Ricardo,

Ez, neuk igorritako mezuak ez du zerikusirik doktorego tesi horrekin.
Zerikusia du, ordea, zure blog hau irakurtzen dutenekin, zeinen artean egon bailiteke baten bat interesaturik Peru Abarcaren textu originalean, ezta?

Neuk etxean dudan eskuizkribua (obra osoa) zein Azkuek Krutwigi oparitu baitzion eta Krutwigek niri Peru Abarca liburuaren Mogelen eskuizkribu originala da Azkue jaunaren iritziz.

Agian milaka euskal filologoen artean baten bat egon liteke interesatuta obra honen internetera ekartzearekin.

Neuk egin nuen interneten korritzen duen Peru Abarcaren edizio digitalizatua, baina ez nuen originala erabili.

Klaruago dago orain zein den nire helburua?

Adeitsuki

Josu Lavin

Ba neuk idazten dut esateko tamalez ez dudala joaterik, nahiz eta biziki desiatu, tesi hori urtetan itxoiten egon garen horietakoa baita. Beraz, aldez aurretik zorionak Julen Arriolabengoari, ziur bainago egun gogoangarria izango dela berarentzat eta baita ere horrelako kontuez arduratzen garen guztiontzat.

Eta honekin batera gehitu nahi nuke hurrengo arazoa tesiaren beraren argitalpenarena izango dela. Hori ere urtetan itxaron beharko dugu? Jakina, beti para daiteke bertsio bat interneten, baina nire ustez ez da aski, inondik inora. Eta berdin esango nuke, adibidez, azken urtean euskal filologiarekin lotuta irakurri diren beste tesi guztientzat (Ricardorena berarena, G. Bilbaorena, eta oraintxe gogoan ez dudan beste bat, gutxienez). Nor arduratuko da horientzat liburu formato estandarreko bertsio duin bana egiten?

Azken oharra: datorren astean euskal filologiarekin lotura zuzen-zuzena duen beste tesi bat irakurtzen da Leioan.

Egilea: Jurgi Kintana
Zuzendaria: Joseba Agirreazkuenaga
Izenburua: "Intelektualen sorrera eta bilakaera Euskal Herrian: Resurrecion Maria Azkue (1864-1951)"

Leioako "Rosetta" aretoan, Lan Harremanen eraikinean (campuseko ate nagusitik sartu eta eskumaldeko lehen-lehena), goizeko 11etan, abenduaren 19an, asteartea.

Nik neuk osorik irakurtzeko aukera izan dut eta ez daukat ahoan bilorik esateko bikaina dela, mugarri bat izango dela euskal historian, eta euskal-filologo orok irakurri beharrekoa dela, beste ezertarako ez balitz ere Azkueri buruz zirkulatzen duten zenbait topiko bere tokian kokatzeko.

Alde ugari baldin badu komentatzeko, esango nuke Azkuek Sabino Aranarekin eta "sabinianismo linguistiko"-arekin (terminoa neurea da) izan zuen harreman argitzeko guztiz beharrezkoa dela, eta, bide horretatik, ondo ulertzeko zer den euskara batua eta zeintzuk bere oinarri historikoak.

Eta puntu honetan aprobetxatuko dut gogoratzeko Azkueren ondorengoa Euskaltzaindiaren aulkian Koldo Mitxelena izan zela, baita ere haren asmo, borroka, kezka eta beharleku ugarietan. Eta abar.

Berri pozgarria Jurgi Kintanaren tesiari buruz diozuna, Pruden; hala defentsa laster izatea nola tesiaren kalitateaz diozuna (aldez aurretik susmatzen niona, bidenabar esanda).

Kasu honetan, neuk ez dut defentsara joaterik, egun horretan (ere) eskola eman behar dudalako.

Ziur naiz Jurgik primeran egingo duela bere defentsa eta laster izango dugula tesia irakurtzeko aukera (interneten izan edota paperean izan).

Neure tesiari dagokionez, asmoa dut EHUko Argitalpen Zerbitzuen bitartez ateratzeko. Gauza guztiak bere bidetik joanez gero, eta atzerapenik ez badago, esan didate sei hilabete inguru behar dela liburua kaleratzeko.