FiloBlogia

Ricardo Gómezen bloga

Mezua: Barrutiaren lana berriz antzeztuko da

2006-12-07

18:05:14, Atalak: Filologia, Euskara, Euskararen_historia

Barrutiaren lana berriz antzeztuko da

Hil honen 16 eta 17an Arrasaten, eta 23an Aramaion, Pedro Ignazio Barrutiak idatzitako Acto para la Nochebuena antzeztuko da, Doke Antzerki Taldearen eskutik.

Barrutiaren lana XVIII. mendearen hasieran ondu eta taularatu zen eta Hego Euskal Herrian gorde den lehen euskal antzerki-lana da (nahiz eta, beharbada, ez idatzi zen lehena, Mitxelenak susmatzen zuenez).

Eskuizkribua Juan Carlos Guerrak aurkitu eta kopiatu zuen XIX. mende amaieran eta Azkuek argitaratu zuen 1897an Euskalzale aldizkarian. Eskuizkribua galdurik, XX. mendean Gabriel Arestik birritan argitaratu zuen Barrutiaren lana, Guerra eta Azkueren lekukotasunetan oinarritua, eta 1983an Joseba A. Lakarrak edizio kritikoa prestatu zuen, aurreko guztiak aintzat harturik. Alabaina, Latxagak eskuizkribu originala berraurkitu zuen eta 1983 urtean bertan edizio bikoitza prestatu zuen, faksimilea eta paleografikoa (itxuraz bederen). Hortaz, oraindik eskuizkribuan oinarrituko den edizio kritiko bat falta da.

Iturria:

Sustatu: 18. mendeko antzezlana, berriro Arrasaten eta Aramaion

Eguneratzea (2006-XII-12):

Berria egunkarian Josemari Velez de Mendizabal aramaioarraren artikulu bat argitaratu da gaur: "Barrutia berriro gure artean".