FiloBlogia

Ricardo Gómezen bloga

Mezua: Masifikazioa aitzakia al da?

2006-09-17

16:38:36, Atalak: Unibertsitatea/Irakaskuntza, Aipuak

Masifikazioa aitzakia al da?

Hona hemen nire harpidetzak irakurtzean aurkitu dudan esaldia (neuk euskaratua):

Askotan, masifikazioa irakasleek erabiltzen duten aitzakia bat da, beren irakaskuntza-alternatibarik eza justifikatzeko.

Ikasturte hasiera honetan, eta Bolognako prozesuak ekarriko omen dituen aldaketak gogoan, guztiz esaldi iradokigarri eta gogo-zirikatzailea iruditzen zait.

Zer uste duzue?

Iturria: Desde mi tarima: a vista de profesor

Zabaldu•

Bildu•

Twitter• Permalink-a • 7 erantzun

Erantzunak, Pingback-ak:

Bidaltzailea: Ekaitz Santazilia [Kidea] · http://www.blogari.net/euskofilia

Gurean bederen ez dut uste aitzakia erabilgarria denik, ikasgai gehienetan ez baikara hogeita hamar ikasle baino gehiago, eta askotan hamabost baino gutxiago ere izaten garelako (honek eskoletara bertaratze urritasunaz ere pentsarazi egiten du). Ikaslearen ikuspuntutik esan beharra dut masifikatuak ez dauden eskolak zinez probetxugarriagoak iruditzen zaizkidala, eta aukera gehiago ematen dituztela.

2006-09-17 @ 17:24

Bidaltzailea: Borja Ariztimuño López [Bisitaria]

Nik ere uste dut masifikazioa denon kalterako dela, ezinezkoa baita tratu edo harreman egoki eta emankorrik izatea horrenbeste ikasleekin... Goian ipini duzun argazkiak beldurra ematen du, espero dut gure karreran horrelakorik ez topatzea!

2006-09-17 @ 17:38

Bidaltzailea: amets [Bisitaria]

Aurreko biekin bat natorrela esan behar dut.Iruditzen zait nahi duenak, aukera duela bere irakaskuntza aukerak ahalbidetzeko. Beste kontu bat da zein puntutarainoko interesa duen eta zein puntutarainoko inplikazioa; irakasten duen horrek benetan ikastea edo memorizazio lan hutsa eskatzen duen.Pentsatzen dut irakasleak gaiarekiko eta taldearekiko erakusten duen interesak garrantzi handia duela eta hainbatek masifikazioa aitzakia merketzat erabiltzen duela.
Gogo-zirikatzaile izan daiteke edo da esan beharko? interesen arabera jokatzen baitugu, batzuetan gainera zer izan daitekeen jakin gabe geureari eutsiz itsu-itsuan, edozein une nahiz aukera erabiliaz geurea defendatzeko.

2006-09-17 @ 18:08

Bidaltzailea: Ekaitz Santazilia [Kidea] · http://www.blogari.net/euskofilia

Borja eta Amets, ikaskide maiteok! pozten naik aktibo jarraitzen duzuela ikusteak, ikusten diat hasteko gogoz zaudetela. Fite ekinen zioagu elkarrekin txanpa berriari!

2006-09-17 @ 21:20

Bidaltzailea: Ricardo Gómez [Kidea]

Ni ere pozten nau bota dudan galderari hain laster eta gogotsu erantzun izanak... noiz eta igande batean!!

Lasai egon, Borja. Ez dut uste gure karreran halako masifikazio batera iritsiko garen, zorionez.

Ni ere talde txikien alde nago, 10-20 bitartekoak aukeran. Gaur egun daukagunaren bestelako antolakuntza bagenu, izan genitzake eskola magistraletarako talde handiagoak eta praktikoetarako txikiagoak (mintegiak, ariketak, irakurketak, testu-iruzkinak, etab. egiteko). Baina gaur egun hori oso zaila iruditzen zait.

Ikusten dudan beste arazo bat hauxe da: matrikulatuen kopuruaren eta eskoletara agertzen direnen arteko diferentzia, oso diferentzia handia kasu batzuetan. Honek irakaslearen plangintza arras oztopatzen du, ez baitaki praktikan zenbat ikaslerentzat prestatu behar duen ikastaroa.

Batzuen ustez, Bolognako prozesuak ekarriko dituen aldaketen artean, ikasleen parte hartze handiagoa eta aktiboagoa dago. Eta irakasleok ere horretarako prestatu behar ditugu geure buruak eta geure metodoak. Hoberako izango den denborak esango du!

2006-09-17 @ 21:45

Bidaltzailea: Pruden Gartzia [Bisitaria]

Tira, horrelako gauzak irakurrita dinosauro sentitzen naiz, zeren, ni horrelako geleta (hiper)masifikatuetan ikasitakoa naiz karrera osoa... Gogoan dut Fakultate zaharrean (hots, Gasteizko seminarioaren eraikinean) talde arruntek 150-180 ikasle izaten zituztela; eskolak frontoian ematen ziren... a zer denborak!
Eta, hara, esango nuke gaur egungo 35-45 urte bitarteko guztiok (guztiz gehienok) horrela lizentziatu ginela. Ez dakit datu inportantea den unibertsitateaz dugun irudia ulertzeko... (orain latinezko esaldi aproposen bat gehitu beharko nuke, baina ez zait batere bururatzen).

2006-09-18 @ 08:31

Bidaltzailea: Ricardo Gómez [Kidea]

Zer moduz Zizeronen "O tempora, o mores!" harako hura? ;-)

2006-09-18 @ 10:26