FiloBlogia

Gaur egun unibertsitate ikasketak bukatu dituen batek, Bigarren Hezkuntzan irakasle gisa jardun nahi badu, lehenago Irakaskuntzarako Gaitasun Ziurtagiria (CAP famatua) lortu behar du, horretarako 180 bat orduko ikastaro berezi bat eginez.

Baina, Goi Hezkuntzaren Europako Konbergentziak edo Bolognako prozesuak ekarritako aldaketen itzalpean, ikastaro horren ordez 900 orduko master bat jarri nahi dute Espainian.

Aldaketa honek ondorio larriak ekarriko ditu, bereziki lan irtenbide nagusietakoa Bigarren Hezkuntzako irakaskuntza duten karreretan (letretakoak batik bat). Izan ere, halako master bat egonik, ikasketa horien inguruko gainerako master eta graduondoko ikasketek etorkizun beltza dute, nekez lortuko luketelako ikasle nahikorik aurrera ateratzeko.

Hau dela eta, joan den astean, Filologia eta Geografi-Historia Fakultateko Batzarrak hurrengo adierazpen hau onartu zuen. Erabiltzen duen gaia oso garrantzi handikoa denez, hona aldatzea erabaki dut (agertzen diren loturak neuk jarri ditut):

Filologia eta Geografi-Historia Fakultateko Batzarraren Adierazpena Masterreko Unibertsitate Titulu Ofizialaren proposamenaren gainean Bigarren Hezkuntzako Irakasleak Prestatzeko (56/2005eko ED, urtarrilaren 21ekoa)

Masterreko Unibertsitate Titulu Ofizialerako proposamen honek egundoko kezka sortu du Estatuko Letren eta Humanitateen fakultateetan, baita beste diziplina batzuetan ere, guztietan unibertsitateaz kanpoko hezkuntza ikasleen enplegagarritasun iturria baita.

Nahiz eta proposamena Goi Mailako Hezkuntzaren Europako Konbergentziaren fruitu gisa justifikatzen den, ez dago Europan bigarren hezkuntzako irakasle lanbidearen jarduna ixteko esklusibitatea duen masterrik, eta, hori gutxi balitz, beste master batzuen antzera, ikaslea aldi berean ikerketarako gaitzen duenik. Europan egon badira lortu nahi diren pedagogi helburuak lortzeko bitartekoak, baina, egia esan, estatuetako hiriburuen jarraibide komunik gabe.

Masterreko Unibertsitate Titulu Ofizialerako proposamen honek guztiz onartezina den aukera desproportzionaltasun bat darama berekin, gure tituludunak lehen lan iturrirako sarbidea lortzeko master hori egin beharrean egonez gero, unibertsitateak eskaintzen duen beste edozein master egiteko asmoa kenduko baitie.

Horren ondorioz, oso epe laburrera, bigarren hezkuntzan irakats ardurak eduki eta jakintza arlo, sail eta Filologia eta Geografi-Historia Fakultatea bezalako beste ikastegi batzuekin lotutako ikerketa gainbeheratu egingo da. Bideratzeko moduko ikerketa masterrik gabe, unibertsitatearen ikerketa gaitasuna nabarmen jaitsi eta unibertsitatera irakasle eta ikertzaile gehiago sartzea eragotziko da. Horrenbestez, ez da gauzatuko goiko hezkuntzako irakasleen nahitaezko belaunaldi berriztapena.

Masterreko Unibertsitate Titulu Ofizialerako proposamen honek ere ez ditu bermatzen erdietsi nahi dituen prestakuntza helburuen lorpena (bide batez, inork ez ditu helburu horiek zalantzatan jartzen) nahastu egiten baitira gradu titulu partikularretako berezko ezagutza, gaitasun eta abileziak (aldez aurretik aski murriztuak daudenak egungo egitura eta posibilitateekiko) hezkuntzaren alderdi psiko-soziologikoekin.

Hori guztia gogoan izanik, erraz bila daitezke tituludunek pedagogi gaitasuna egiaztatzeko beste bide batzuk, bigarren hezkuntzako irakasleen prestakuntzarako Masterreko Unibertsitate Titulu Ofizialerako proposamenaren ondorio negatiboak saiheste aldera: gradu tituluetako curriculum ildoak, ikerketa masterretako moduluak, unibertsitateek ex professo antolatutako masterrak eta abar.

Horiek horrela, Filologia eta Geografi-Historia Fakultateko Batzarrak proiektu hau bertan behera uzteko eskatzen du. Batzarrak eskatzen du, orobat, Euskal Herriko Unibertsitateko errektore jaunak, Estatuko gainerako unibertsitateetako errektoreen antzera, CRUEn adierazpen hau defenda dezan, ahal eta behar den tokietan, Konbergentziaren beste alderdi batzuekin egin duten bezalaxe, master eta doktoregoekin, batik bat.