FiloBlogia

Ricardo Gómezen bloga

2009-06-30

18:57:49, Atalak: Urteurrenak

FiloBlogian duela urte bat, duela urte bi... eta bost!!

Duela urte bat:

2008-06-30: Unibertsitatea, lana eta pentsatzen jakitea. El Rotoren bineta baten harira.
2008-06-17: Unibertsitate publikoaren eginbeharra dirua lortzea ote? EHUko euskarazko udako ikastaro bat bertan behera geratu zen ikasle "gutxiegi" matrikulatu zirelakoan.
2008-06-13: Irakurle lanpostua Birmingham-eko Unibertsitatean.
2008-06-12: Euskaltzaindiaren Nazioarteko XVI. Biltzarra: "Pirinioetako hizkuntzak: lehena eta oraina".
2008-06-10: Bolognari bai, baina ez honela.
2008-06-06: Henrike Knörren omenezko liburuska sarean da.
2008-06-04: Eskari arras zentzuzkoa. Eta, hala ere, oraindik aurrera atera ez dena.

Duela urte bi:

2007-06-30: Espainiako unibertsitate-ikasketen dekretuaren zirriborroa.
2007-06-26: Glottopedia: hizkuntzalarien(tzako) entziklopedia. Ematen du ez duela garapen handirik izan.
2007-06-26: Euskaltzaindia 2.0. Euskaltzaindiak Orotariko Euskal Hiztegia sarean noiz jarriko duen zain. Arestian Joxe Aranzabalek berriro heldu dio gaiari Zer egingo luke Googlek Euskaltzaindia balitz? mezuan.
2007-06-23: Hiru urtez (filo)blogeatzen. Eta aurten bost!!, baina urteurrenaren berri ematea ahaztu zait berriro ere.
2007-06-23: Nolakoak diren kazetariak!!
2007-06-19: Fonologiazko tesi irakurketa ostiralean. Epaimahaikide izan naizen lehen tesia (eta oraingoz bakarra).
2007-06-18: Iruña-Veleiakoa zertan den.
2007-06-18: Bi elkarrizketa: batean kale, bestean bale. Egun berean hedabideetan Ribero-Menesesi eta Joseba Lakarrari egindako elkarrizketa bana agertu ziren. Ez dago konparaziorik!!!
2007-06-11: Euskal Hizkuntzalaritza eta Filologia Masterra: ikastaroak eta helburuak. 2009/2010 ikasturterako aurrematrikulazioa uztailaren 10 arte zabalik dago.
2007-06-10: Irakurle lanpostua Moskuko Unibertsitatean.
2007-06-07: Apaltasunaren omenez. Ribero-Menesesek bere burua munduko zientifiko handienen artean sartzen du.
2007-06-06: Quosque tandem... (III): Ribero Meneses rides again.
2007-06-01: Larry Trasken omenaldi-liburua kaleratu da.
2007-06-01: ASJUren argitalpen berriak. Orain aurkibide guztiak Dialnet datubasean daude.

Duela hiru urte:

2006-06-29: Unibertsitateko irakasleen osagarriak.
2006-06-23: Beste tesi baten defentsa.
2006-06-21: Jakin aldizkari osoa Interneten. Aldizkariaren 50. urteurrena ospatzeko webgune berezian kokatu zituzten artikulu guztiak.
2006-06-19: Tesi baten defentsa Arabako Campusean. Henrike Knörrek zuzendutako azken tesia izan zen.
2006-06-19: Marges linguistiques 11: Hizkuntzaren eta hizkuntzen jatorria. Tamalez, hura izan zen Marges linguistiques-en azken alea; geroztik aldizkaria itxi egin zen.
2006-06-16: Iruña-Veleiako aurkikuntzei buruzko loturak del.icio.us-en. Egun haietan hedabideetan eta Interneten ugari ziren Iruña-Veleiako aurkikuntzei buruzko albisteak eta filtrazioak, hartara del.icio.us-en lotura guztiak biltzen saiatu nintzen. Horretan jarraitu dut eta, seguru asko atera den guztia bildu ez badut ere, egun 875 lotura daude veleia etiketapean.
2006-06-10: Euskarazko idatzirik zaharrenak Iruña-Veleian? Oraingoz amaitu ez den kontua. Inoiz amaituko?
2006-06-04: Klasikoen Gordailuak Kardaberazen lau lan sareratu ditu.

Duela lau urte:

2005-06-29: "Boteprontoan" bururatuak. Matrikulatu ondoren arrastorik ere uzten ez duten ikasleez ari nintzen: eskoletara ez, tutoretza-orduetara ez, azterketara aurkeztu ez... Urtero halako batzuk izaten ditut (edo ez ditut izaten, hobeto esanda).
2005-06-17: FiloBlogiaren urtebetetzea.
2005-06-16: Bolognako prozesuari buruzko kezkak manifestu batean. Orduko kezkek oraindik ere bizirik jarraitzen dutelakoan nago.
2005-06-16: Aramaioko IV. Uda Ikastaroa.
2005-06-10: Hugo Schuchardten lan guztiak Interneten eskura. Izugarrizko webgune baliagarria; besteak beste, Schuchardten lan guztiak on line eta PDFn izateko aukera ematen digu.

...eta duela bost urte:

2004-06-30: HIZTEGIA.NET euskal hiztegien biltegia. Hazitzen eta hobetzen jarraitzen du.
2004-06-17: Hau hasiera baino ez da. Blogari hasiera eman zion mezua.

Zabaldu•

Bildu•

Twitter• Permalink-a • Erantzun 1

2009-06-29

00:04:41, Atalak: Denetarik

Vuvuzela

Egunotan, aurtengo FIFA Konfederazioen Txapelketako partidaren bat ikusi baduzue (entzun, hobeto esanda), seguru nago berehala asmatu duzuela zertaz ari naizen.

Izan ere, vuvuzela izena dute Hego Afrikako zaletuek futbol partidak "animatzeko" erabiltzen dituzten plastikozko tronpeta zaratatsu horiek.

Niri jasanezinak egin zaizkit partidak, vuvuzelen zarata dela-eta, eta askotan partidak bertan behera utzi behar izan ditut lehen minutuetan.

Behingoz, hitz berri bat ikasi dut. Vuvzela ez dago oraindik munduko hiztegi gehienetan, baina hainbatetan sartzeko aukera du, are gehiago datorren urteko Munduko Futbol Txapelketan berriro erasotzen badute.

Bide batez, gogoan dut gaztetan, 14 bat urte nituelarik, halako tronpeta bat erosi nuela, oso ondo ez dakit zertarako. Artean, noski, ez nekien zenbat buruko min emango zidaten haren kide hegoafrikarrek urte batzuk geroago.

Iturria eta argibide gehiago:

Vuvuzela | The Language Log
Vuvuzela Popular Symbol of South African Football | VOA News

Zabaldu•

Bildu•

Twitter• Permalink-a • Erantzun

2009-06-26

23:19:05, Atalak: Unibertsitatea/Irakaskuntza, Deialdiak

Lan boltsak Hizkuntzalaritza eta Euskal Ikastetak Sailean

Ekainaren 24an, Hizkuntzalaritza eta Euskal Ikasketak Sailean irakasleen ordezkapenak egiteko hiru lan boltsa deitu ditu UPV/EHUk, beste batzuekin batera.

Hauek dira hiru boltsen ezaugarri nagusiak (gainerakoak beheko dokumentazioan aurki daitezke):

1. Jakintza arloa: Euskal Filologia
Jarduera: Euskal literatura eta filologia

2. Jakintza arloa: Euskal Filologia
Jarduera: Euskal hizkuntzalaritza

3. Jakintza arloa: Hizkuntzalaritza orokorra

Instantziak aurkezteko epea 2009ko uztailaren 6an bukatuko da.

Dokumentazioa:

Deialdiaren oinarriak (.PDF)
Boltsen ezaugarriak (.PDF)
Eskabidea gaztelaniaz soilik (.DOC) [beste deialdi bati dagokion arren, euskarazko honek balio duela uste dut (.DOC)]
Epaimahiak (.DOC)

Zabaldu•

Bildu•

Twitter• Permalink-a • Erantzun

2009-06-24

19:47:54, Atalak: Argitalpenak, Internet, Liburuak, Dialektologia, Euskalaritzaren_historia, Euskararen_historia

Bi liburu eta webgune bat

Azken asteotan argitaratu diren bi liburu aipatu nahi nituzke, begitantzen zaidalako biak ala biak garrantzi handiko lanak direla eta mugarri berriak markatu ditzaketela, zeinek bere arloan.

Lehena Iñaki Caminoren Dialektologiatik euskalkietara tradizioan gaindi (Elkar, 2009). Dialektologiaren teoria eta metodologia xehe-xeheki aztertzen ditu eta euskal dialektologiaren historia ezin interesgarriago bat eskaintzen digu. Liburu mardula da, unibertsitateko eskuliburu bezala ederki erabil litekeena.

Bigarrena, Jurgi Kintanaren Intelektuala nazioa eraikitzen. R. M. Azkueren pentsaera eta obra (Euskaltzaindia, 2009). Kintanaren doktorego-tesian oinarritzen da liburua eta bereziki R.M. Azkueren ibilbide intelektuala aztertzen du, hala nola haren ideia politikoak edo euskara modernizatzeko proiektua.

Ea uda honetan bi liburuak patxadaz irakurtzeko betarik dudan.

Azkue gaztea

Bestalde, gaur bertan, Koldo J. Garairi esker, aurkitu dudan webgune bat ere ekarri nahi dut hona, euskal dialektologian eta euskararen historian interesa duen edonorentzat oso tresna baliagarria delakoan:

Bonaparte Ondarea
Webguneak 1992-2000 bitartean liburu moduan eta 2005ean CD-ROM batean Deustuko ikerketa-talde batek argitaratu zituen Bonaparte Ondareko eskuizkribuen edizioak eta azterketak sareratzen ditu; halaber, analizatzaile morfosintaktiko bat gehitu dute, edizioak XML bidez etiketatuta daudenez, bilaketa zehatzak egiteko aukera ematen duena.

Alabaina, CD-ROMa argitaratu zenean adierazi nuen bezala, berriz ere edizio eta azterketekin batera eskuizkribuen faksimileak ere sartzeko aukera galdu da, tamalez.

Bonaparte printzea