Mezua: "Aspertzen bazara.... ikertu euskara!" Josu Zugasti

2008-06-27

Permalink 00:40:52, Atalak: euskofilia, Euskarari buruz  

"Aspertzen bazara.... ikertu euskara!" Josu Zugasti

Josu Zugasti ikaskideak Berrian (2008-06-26) idatzitako iritzi artikulua da hau. Zenbat aldiz esan ditugun horrelakoak! Bota zuen iritzia honen inguruan:


Aspertzen bazara.... ikertu euskara!

Zeharo gogaikarriak dira azkenaldian euskararen inguruan berriz azaltzen ari diren teoria eta aurreiritzi zahar zentzugabeak. Zentzugabeak baina ederrak, jendea liluratzeko gaitasuna daukatenak. Nahiz eta orain dela hirurogei urtetik filologo batek ere defendatzen ez dituen, kontrako frogak gehiegi izan direlako eta edozein alor zientifikotan ikerketak eta teoriak datuen eta metodologia zorrotz baten menpe egon behar direlako. Baina batzuen ustez, Basque is different. Zeren hau euskara da, munduko hizkuntzarik zaharrena, unibertsitateetako hizkuntzalari eta filologoek ezjakintasunez eta aurreiritziz erdi-ikertua dagoena, euskaldun sen sakon eta prehistorikotik bakarrik uler daitekeena.

Horrelako teoria xelebreen erakusgarri gutxi batzuk:

-Iberikoa (eta tartesikoa eta etruskoa...) euskararen bitartez irakur daitezke: Gezurra. Filologoak ez daude Euskal Herrian bakarrik, mundu mailako esparru zientifiko sendo eta aski garatua delako, eta iberikoz dauden testu urriak dagoeneko ondo konparatu eta ikertu dira. Ez dago ia morfema bakar bat ere testuinguruaren arabera euskararekin konparatu daitekeenik irizpide eta iragazki fonologiko eta semantiko serioak erabilita.

-Latina eta Europako hizkuntzak euskara ziren prehistorian: Gezurra (eufemismo bat erabili dut). Horren azpian beste aurreiritzi bat dago: euskara ez da aldatzen. Ba, euskara aldatu egiten da (ikusi bestela testu zaharrak!), hots berriak hartzen ditu inguruko hizkuntzetatik (gaztelerazko j eta frantsesezko r bezala), hitzak sortzen eta hartzen ditu, hitzak eta egiturak itxuraldatu egiten ditu belaunaldiz belaunaldi (horrela sortu dira euskalkiak)... Beraz, inguruko hizkuntzak beste aldatu den gaurko euskararen bitartez latinaren prehistoria azaldu nahi izateak ez dauka zentzurik eta kito. Batez ere, latina, bere familiako hizkuntzekin batera, gehien eta sakonen ikertu den hizkuntza delako eta ezin ditugulako ikerketa horiek ahaztu.

-Euskara hizkuntza kaukasoarrekin eta bereberrarekin lotuta dago: Horrelako konparaketak hitz gutxi batzuk konparatuz (eta gaizki konparatuz) sortu dira eta behin ere ez dute sinesgarritasunik eduki. Normala da kasualitatez hitz gutxi batzuk antzeko itxura izatea bi hizkuntzatan, baina hizkuntzaren historian (testu zaharretan) atzera eginez gero, ikusiko dugu ziurrenik bi formak denboran atzera egin ahala aldenduz doazela bata bestetik.

Tristea iruditzen zait gurea bezalako herri kultu batean oraindik, sarri euskaraz ere ez dakiten batzuek jarraitzaileak lortzea aurrekoak bezalako teoriekin. Tristea egiten zait Euskararen Jatorriaren Batzarrak egitea, druiden batzarren antza daukatelako. Eta inori ez litzaiokeelako ondo irudituko filologo batek astrofisikaz ezer irakurri barik Astrofisikaren Batzarrak antolatzea, han esango dituen astakeriak zientzia bailiran aurkeztuz.

Badaude lan serioak protoeuskararen gainean. Joseba Lakarra, Koldo Mitxelena, Joaquin Gorrotxategi eta beste hainbat; autore eta zientzialari zorrotzak eta jakintza sendokoak dira eta euren artikulu edota liburuak ez daude Vatikanoko liburutegi sekretuan. Gai honetan interesa daukanak jo beza haien lan zientifikoetara eta ez teoria ikusgarri eta hutsaletara, bada garaia eta.

Josu Zugasti. Euskal Filologiako ikaslea (Arrasate).

Erantzunak, Pingback-ak:

Bidaltzailea: urtzi [Bisitaria] · http://www.blogak.com/urtzi
Ez nauk oraindik filologoa, urte pare bat geratzen zaizkidak lizentziatu izateko, baina ze nahi dek esatea! guztiz ados nagok esan zian guztiarekin. Josu Naberanen liburuan begirada bat eman diat eta... iraganera itzultzea bezala dek, euskarak iberierarekin zerikusia ziala esaten zitean garaira, aspaldi frogatu zitean ez ditukela ahaideak, baina Naberanen arabera euskara 3 hizkuntza handi baten fusioz sortu huan, tartean iberiera... gomendatzen diat liburu hau, barre egin nahi badek... gezurra gezurraren atzetik...

ni ere euskararen jatorriko batzuk tartean sartu nahi izan ninditean, euskara neolitikoan ere hitz egiten zela komentzitu nahi izan ninditean, Lakarra ez omen dek filologo 'ona'...

beste gauza bat, hurrengo urterako hautazkoak begiratzen aritu nauk eta bi zerrenda ikusi dizkiat, bata hautazkoetan eta bestea lerro kurrikularrak jartzen dikena, zein dek bien arteko diferentzia? Lerro kurrikularreko batzuk hautazko bezala zeudek baina denak ez? ez zeudekenak balio ditek hautazko bezala?

erantzun nahi badidak hementxe bertan edo urtzi13@hotmail.com posta elektronikora ahal didak idatzi.

eskerrik asko

urtzi
Permalink-a mezu RSS 2008-06-27 @ 22:13
Bidaltzailea: Ekaitz Santazilia [Kidea] · http://www.blogari.net/euskofilia
Aupa Urtzi, oporrak ongi?

Lerro kurrikularra eta hautazkoen arteko aldea esplikatuko diat:

Bazegok, Euskal Filologian lizentziatu tituluaz gain, aipamen berezi bat lortzeko aukera: Euskal hizkuntzalaritzako aipamena. Curriculuma osatzeko plus moduko bat. Hori lortzeko, hautazko jakin batzuk hartu behar dituk; urte horretan eskaintzen eta zerrenda horretan agertzen direnen artean 36 kreditu hartu behar dituk 3. eta 4. mailan banaturik. Kreditu horiek hautazko bezala ere kontatzen ditek, ez dituk 36 kreditu gehiago egin behar.

Beraz, hautazkoen zerrendatik ikasgai batzuk aipamen hori lortzeko balio ditek; zerrendan agertzen direnak hain zuzen. Ez dituk eduki eta irakasle ikasgai diferenteak curriculum lerroan agertzen direnak eta hautazkoen zerrendan agertzen direnak; besterik gabe, hautazko batzuk plus hori lortzeko balio ditek.

Nik uste merezi duela, behin hautazkoak hartu behar dituanez, zerrenda gorretatik aukeratzea. Azken finean urtez urte eskaintzen diren hautazko gehienak aipamenerako zerrendan egoten dituk, urtero irakaskuntza eskaintza antolatzean lehentasuna baitute hautazko ikasgai horiek, curriculumerako balio ez dutenek baino.

Hori bai, batzuek esaten ditek aipamena lortzeko balio duten hautazkoak gogorxeagoak direla... Baina hori bakoitzak baloratu behar dik...

Barka horren luze aritu izana, zerbait ez badiat ongi esplikatu edo duda gehiago badituk, galdetu trankil.


Egon ongi!
Permalink-a mezu RSS 2008-06-28 @ 00:16
Bidaltzailea: urtzi [Bisitaria] · http://www.blogak.com/urtzi
Eskerrik asko azalpenagatik!

ondo pasa udara!

urtzi
Permalink-a mezu RSS 2008-06-28 @ 10:43

Erantzun:

Zure eposta ez da orrialdean erakutsiko.
Zure URL-a erakutsiko da.
Onartutako XHTML etiketak: <p, ul, ol, li, dl, dt, dd, address, blockquote, ins, del, span, bdo, br, em, strong, dfn, code, samp, kdb, var, cite, abbr, acronym, q, sub, sup, tt, i, b, big, small, img>


authimage

Aukerak:
 
(Lerro saltoak <br /> bihurtzen dira)
(Izena, eposta & url-arentzako cookiak finkatu)
----------

euskofilia

Euskal Filologia ikasleok euskararen, filologiaren eta ikasketen alorrean ditugun galderak, zalantzak, iritziak eta proposamenak botatzeko gunea. (Ekaitz Santazilia)

Bilaketa

Blog hau sindikatu

Zer da hau?

Elurnet Informatika Zebitzuek eskaintzen duten zerbitzua
Ikastaroak, garapena, zerbitzu informatikoak, blogak

powered by
b2evolution