euskofilia

Armiarmaren Literatur Emailuak blogean irakurri dudanez, Klasikoen Gordailuak obra zenbaiten faksimileak interneten paratzeko asmoa du, aurkitzen zailak izaki. Hasteko, hamazazpi titulu sareratu ditu PDFn:

• Dotrina kristiana (1617, 1623)
        Estebe Materre
• Tratazen da nola enzun bear den meza (1621)
        Juan Beriain
• Manual debozionezkoa (1627, 1669)
        Joanes Etxeberri, «Etxeberri Ziburukoa»
• Noelak (1630, 1645)
        Joanes Etxeberri, «Etxeberri Ziburukoa»
• Debozino eskuarra (1635)
        Joanes Haranburu
• Elizara erabiltzeko liburua (1636, 1665)
        Joanes Etxeberri, «Etxeberri Ziburukoa»
• Gero (1643)
        Pedro Agerre, «Axular»
• Giristinoaren dotrina (1656)
        Silvain Pouvreau
• O.ten gaztaroa neurtitzetan (1657)
        Arnaud Oihenart
• Filotea (1664)
        Silvain Pouvreau
• Gudu espirituala (1665)
        Silvain Pouvreau
• Onsa hilzeko bidia (1666)
        Juan Tartas
• Arima penitentearen okupazione debotak (1672)
        Juan Tartas
• Itxasoko Nabigazionekoa (1677)
        Piarres Etxeberri, «Etxeberri Dorre»
• Jesu Kristoren Imitazionea (1684)
        Aranbillaga
• Egia katholikak (1686)
        Bernard Gazteluzar
• Katexima labürra (1696)
        Athanase Belapeire

Hauek Ricardo Gómezek sortutako liburutegi birtualarekin batera, interneteko euskarazko eta euskarari buruzko corpus faksimilea aberasten doa.

1995an Nafarroako Kutxak Christie's subasta etxean Johanes Leizarragaren Iesvs Christ gvre iavnaren Testamentv Berria liburuaren lehen edizioa (1571) erosi zuen 33 milioi pezetatan.

Azkenean eta aski kostarik, edizio faksimile fidela argitaratu berri du kutxak. Originala ahal bezainbeste errespetatu nahi izan dute eta azalak, paper mota, enkuadernazioa eta litografiak ahal bezain fidelki kopiatu dira.
Bestalde, Xabier Kintanak, Henrike Knörrek eta Txomin Peillenek egileari buruzko testuak ere ondu dituzte eta Fernando Pérez Ollo kazetariak liburuaren beraren historia aztertu du.

Ale zenbait Euskaltzaindira eta Eusko Ikaskuntzara bidali dira eta fite egonen da salgai liburudendetan, 25 edo 30 bat eurotan.


Iturria:

Diario de Noticias de Navarra (2007-09-21)

  

Jadanik ikusten ahal dugu UPV-EHUko ikasleok matrikula egiteko noiz dugun hitzordua. Horretarako, GAUR aplikazioan sartu eta honako pausoak jarraitu:

• Ikasleak
• Unibertsitateko akademi gestio gaurkotua
• Erabiltzailea (NANa letrarik gabe) eta pasahitza (lau zenbaki) sartu eta SARTUteklari eman
• "Matrikulak" atala zabaldu eta "automatrikularako hitzordua" sakatu
• NANa sartu berriz, letrarik gabe, eta "Bilatu" sakatu.
• Gure NAN zenbakia (urdinez) sakatu 

Hor dugu hitzordua. Antza denez matrikula interneten bidez ere egiteko aukera dago (edo egonen da, niri ez dit utzi momentuz). Horretarako ere GAUR aplikazioan sartu behar dugu, eta "Matrikulak" atalean "Automatrikula" sakatu. Internet bidezko matrikula egiteko pauso guztiak UPV-EHUren gune nagusian daude, bideo honetan esplikaturik. 

Ea aurtengoan arazorik ez dugun ditxosozko matrikularekin!

Eguneratzea (2007-09-19):

Ez dut arazorik izan matrikula interneten bidez egiteko, neukan hitzorduaren barnean, hori bai, Internet Explorer nabigatzailea erabili, besteekin arazoak baitaude.

Iaz egin nuen bezala, 2006-2007 ikasturtean Euskal Filologia karrerako ikasgaietan egindako lan garrantzitsuenak ekarri ditut hona, ikaskideei lagungarri izanen zaizkielakoan. Hemen daudenak zuzenean irakasleari entregatutakoak dira, zuzenketarik eta hobekuntzarik gabe, akasdunak beraz. Hauetako bat edo besteren bertsio hobetua fite ARTXIKER datu basean agertzea baliteke. Zeinahi iruzkin edo ohar eskertzekoa izanen da:

Lanak jeisteko (Word), egin klik izenburuan:

Literaturaren teoria ikasgairako (Karlos Otegi): "Pragmatika literarioaz diharduten hiru artikuluri buruzko hausnarketa". Hiru artikulu hartu nituen eta berauek iruzkindu, pragmatika literarioa zer den ulertzeko. Gakoak: pragmatika, literatura, teoria, semiotika. Nota: 9'5.

Literaturaren teoria ikasgairako (Karlos Otegi): "Semiotikarako sarrera". Semiotika literarioaren diakronia eta definizioa, aplikazio diferenteekin batera. Gakoak: diakronia, literatura, teoria, semiotika. Nota: 9'5.

Euskal psikolinguistika ikasgairako (Itziar Idiazabal): "Bi haurren jardunaren azterketa, behaketaren bidez". Bi (edo hiru) haurri ipinak kontaarazi eta berorien azterketa linguistikoa egin da, morfologia, joskera, jarioa eta bestelakoak aztertuz. Gakoak: Psikolinguistika, behaketa, morfologia, sintaxia, joskera, jarioa. Nota: 9.

Euskal literatura II ikasgairako (Jon Kortazar): "Gauak eta hiriak nobelaren lekuen azterketa". Ur Apalategiren nobelan agertzen diren lekuen bilketa eta azterketa semiotikoa. Gakoak: Ur Apalategi, Gauak eta hiriak, lekuak, semiotika, topotipoa. Nota: ?? Ikasgaiaren nota: 10.

Euskara II ikasgairako (Patxi Goenaga): "Lazarragaren perfektibo zaharrari lehen hurbilketa". Joan Perez de Lazarragaren testuan azaltzen den perfektibo edo aoristo zaharraren azterketa sintaktiko, morfologiko eta pragmatikoa. Gakoak: Lazarraga, aoristoa, perfektiboa, sintaxia, morfologia, erabilera. Nota: ??. Ikasgaiaren nota: 10.

Irakurketa on izan dezazuela!


Loturik honekin:

• Euskofilia (2006-09-26): "Euskal Filologia lanak sarean"