euskofilia

Jadanik atera dira EHUk antolatzen dituen XXVI udako Ikastaroen eta XIX Europar Ikastaroak, 2007koak alegia. Hauek dira nolabait gurearekin loturik daudenak, nahiz eta zerrenda osoa hemen ikus dezakezuen:

Ikastaroak, mintegiak eta jardunaldiak:
   
J ZIKLOA: HIZKUNTZALARITZA ETA LITERATURA

• J.1.-HIZKUNTZEN EBALUAZIOA ESKOLAN IKUSPEGI KOMUNIKATIBOAREN BAITAN (Ikastaroa)
• J.2.-EL APRENDIZAJE DE LA ESCRITURA EN UN MUNDO GLOBAL Y PLURILINGÜE (Curso)
• J.3.-LETURIAREN EGUNKARI EZKUTUA ELEBERRIAREN EKARPENA. XX MENDEKO EUSKAL NARRATIBAREN TESTUINGURUAN (Ikastaroa)
• J.4.-IMPORTANCIA Y DESARROLLO DE LA TRADUCCIÓN E INTERPRETACIÓN EN LOS SERVICIOS PÚBLICOS (Curso)

3. ZIKLOA: KONGRESUAK

• 3.1.- IZEN SINTAGMAREN EGITURA EUSKARAZ: SINTAXIA ETA INTERPRETAZIOA (Nazioarteko topagunea).  

Azken honi buruz ez dago informaziorik webgunean, hala ere, ez du ematen, interesgarria izanik ere, ikasleei zuzendurik dagoenik, adituei baizik. Dena den, inork informazioa izanez gero, eman beza arren. Aurten ere filologia zein hizkuntzalaritzarekin estuki lotzen den ikastarorik ez da egonen tamalez.

J zikloko saioen matrikularen prezioa, ikastaro guztiak 3 egunekoak direnez gero, 70€koa da maiatzaren 31 arte eta gero 84€koa. Halere, bekak badira bai matrikuletarako, bai lojamendurako. Gainera, dakikezuenez, ikasleoi aukera askeko kredituak ematen dizkigute hemen parte hartzeagatik.

GAURKOTZEA 2007-04-6

Fakultateko irakasle batek esan didanez eta azkenean ikastaroen webguneak dioenez, 3.1 jardunaldia doakoa eta denei irekia da, nahiz eta sintaxi ezagupenak beharrezkoak diren.

Azkenean, literaturaz diharduen euskarazko aldizkari bat badugu: Bazka. Gorka Arrese da on lineko agerkari honen zuzendaria. Martxoaren 7an agertu zen lehen aldiz Euskadi Sarien polemikaren harira eta gai honekin loturik dauden hainbat artikulu dakartza. Hala ere, literaturaren inguruan zeinahi hausnarketa egitea du helburu. Astekari izateko asmoz sortutako proiektu honek iragan milurtearen bukaeran Susa paperean argitaratzen hasi zen aldizkariaren jarraitzailea izan nahi du, baina berrikuntzak ere badakartza: alde batetik, Hiztegia. Izenak aditzera ematen duenaren kontra, ez da hitz bilketa bat, baizik eta hitz multzo bilketa bat; prentsan egindako literatura aipamenak biltzen dira. Datutegia izenekoan aldiz, euskal literaturaren industriari buruzko datu zehatzak topatuko ditugu.

Bazen ordua horrelako zer edo zer sor zedin, ez baitu gure literaturak metaliteratura eginen duen argitalpenik kasik.


Iturria:

• Berria.info (2007-3-27)

UPV-EHUko Informatika fakultateko irakasleek egin dute jada. Euren txikitako argazki bat beren blogean ezarri dute eta bakoitza nor den asmatu beharra dago. Oso dibertigarria iruditzen zait, irakasleak animatuko balira blog honetan berean egin genezake antzko zer edo zer. Ez dakit ordea ausartuko diren...


Animatzeko, ikusi informatikakoek egindakoa hemen.

Hona nirea, horrela ez dago aitzakiarik:

Gaur duela urtebete hasi nintzen blog hau idazten. Normalena litzateke denbora azkar pasa zaidala esatea, baina, egia esan, blogak askoz denbora gehiago duelako sentsazioa dut!

Gauzak horrela, eskerrak eman behar dizkizuet egunez egun hemen plazaratutakoak jarraitu dituzuenei, eta bereziki Ricardo Gómezi, askotan nire eredu izan delako blogintzan eta filologian.

Izan dugu gauza serioak, barregarriak, pozgarriak, tristeak, dibergenteak zein interesgarriak plazaratzeko unea, eta hala izan dadila hemendik aitzina!

 
                                             

Berriz ere irakurleoi barkamena eskatu beharrean nago, azken egunetan bloga ez delako behar bezala ibili. Hala ere, esan beharra dago ez dela nire kongtua izan, baizik eta Blogari.net osoarena. Guztiz ezezagun zaizkidan arrazoiak direla-eta, batzuetan (gehiegitan?) Blogari ez dabil ongi, eta erabiltzaileei inolako abisurik eman gabe konexioa mozten da (edo dute, ez dakit) egun batzuez.


Dena den, hemen gara berriz ere.

Haritz Rodriguezen Gutenberg Galaxia blogean irakurri dut. Antza denez, Rodriguezek liburuekiko zaletasuna du eta bilduma polita ari da osatzen. Baten berri ematen digu oraingoan.

 Baionan 1873. urtean Gustave Brunetek argitaratutako atsotitz bilduma da. Kontua da liburua eskuz egindako oharrez josita dagoela eta zenbait errefrau hainbat hizkuntzatan itzulirik agertzen direla. Baina deigarriena nonbait, atsotitz zenbaiten gainean agertzen diren ikurrak dira, irudiz, takigrafia ikurrak. Hoberena artikulua jatorrizko blogetik irakurtzea duzue, informazio gehiago biltzeko:

"Euskara Takigrafiatua, 1888. urtean"

Esan ohi da Euskal Herria filologoz beterik dagoela. Bada, Euskal Herria ez dena ere beterik dago. Bideo honek erakutsi bezala,  Manuel Fraga Iribarne  frankista PPratu ezagunak bere denbora librea euskalaritzari dedikatzen dio, menturaz bere bigarren abizenak kuriositatea pizturik (bai, jaun andreok, ama Izura-Ostabatekoa zuen, euskalduna, gezurra badirudi ere).

Poliki poliki EHUko Euskal Filologia ikasleak ARTXIKER datu basea aberasten hasi gara. Oraingoan Borja Ariztimuño López ikaskide finak iaz ikasgai batetarako egindako lana sareratu du bertan. Lanean Larreko idazle gaztearen aditz sintetikoaren bilketa bat egiteaz gain zenbait iruzkin eskeintzen dizkigu.:

Lazarragaren eskuizkribuko zenbait aditz trinko

 Beraz, bejondeiala Borja! ea hemendik aurrera horrelako opari gehiago ikusten ditugun!