egizu getxo euskaldun

Gure egitasmoen eraginkortasuna neurtzeko ikerketa egin genuen 2009ko azaroan eta abenduan. Lan handiena zuek, berbalagunok, egin zenuten, inkesta luze eta konplexua betez. Bada, gaur mezua jaso dugu AZTIKER Ikergunetik, eta mezua ZORIONTZEKO izan da. Eskerrik asko handi-handia bidali digute, baina berri txar bat emateko ere idatzi dute. Hementxe duzue euren mezua:

igorlea: Urko Ikardo <uikardo@aztiker.com>
hartzailea: EGIZU GETXO EUSKALDUN Elkartea <egizugetxo@yahoo.com>

MINTZAPRAKTIKA EGITASMOEN ERAGINKORTASUNA NEURTZEKO IKERKETA: ZOZKETA

Gogoan izango duzuenez, azaroan eta abenduan mintzapraktika egitasmoetan parte hartzen dutenei inkesta egin genien. Guzti-guztioi zorionak eman nahi dizkizuegu ia 1.800 lagunek erantzun zutelako. Hori egundoko arrakasta da, eta aukera emango digu informazio kalitatezkoa lortzeko. Eskerrik asko denoi, dinamizatzaile, bidelagun zein bidelarioi.

Dakizuenez, inkesta bete zuten guztiek zozketa batean parte hartu zuten, eta horren emaitza jakinaraziko dizuegu jarraian. Saria taldearentzako eta dinamizatzailearentzako izango zela iragarri genuen orduan, eta aukeran izango zenutela afaria edo aste bukaera pasa aterpe edo landetxe batean.

Joan den urtarrilaren 13an, asteartearekin, eguerdiko 12:00etan bildu ginen Eusko Jaurlaritzan, Hizkuntza Politikako Sailburuordetzako teknikariak, AEK-ko ordezkariak, Topaguneko ordezkariak, eta Aztikerreko ikertzaileak. Zozketa egin genuen, eta saria Oioneko inkesta bati, eta ondorioz, bere taldeari egokitu zitzaion. Zorionak hortaz Oionen, ostegunetan, 20:30ean biltzen den taldeari eta bertako dinamizatzaileari.

Gainerakooi eskerrik asko berriz ere zuen laguntzatik eta laster arte
------------------
Urko Ikardo Enparan
[a] Aztiker Ikergunea
943 593006
uikardo@aztiker.com

 

Afaririk ez zaigu tokatu, beraz, otsailaren 20an bertan antolatuko dugu guk geurea. Inauteriak ospatzeko mozorro lehiaketa + afaria egingo dugu. Zein jantzi eramango duzu?

Berbalagun eta gurasolagun taldeen argazkiak bildu nahi genituen, eta horretarako, hain zuzen, antolatu genuen zozketa. Norberak, bere taldeko argazkia egin eta guri bidali besterik ez zuen egin behar parte hartzeko. Saria 30 €ko txekea da, Algortako Orixa liburudendan euskarazko produktuetan gastatzeko.

 

Egun hauetan 20 argazki jaso ditugu, eta 59 berbalagunek parte hartu dute zozketan. Flickr-eko gure albumean dituzue ikusgai. Batzuk irribarretsu, besteak serioago, gehienak mahai baten inguruan. Bizkaiera taldekoen argazkiak izan dira, duda barik, orijinalenak. Aktore lanetan aritu ziren kamera aurrean, zorionak eurei!



Gaur eguerdian, agindu bezala, zozketa egin dugu, eta Rosa Zaballari tokatu zaio saria. Rosa ostiraletan lotzen da bere berbalagunekin, baina honetaz aparte askok ezagutuko duzue mendira askotan etortzen delako. Eta inoiz mendi ibilbideko kronika egilea ere izan da gure blogean. Berbalaguna, mendizalea, kronikagilea... lagun ederra. Zorionak Rosa! Eta ostiral honetan, nahi baduzu, gera gaitezke saria emateko.

Zuen berbalagun taldeko argazkia egin eta bidali. Honekin irabazi ahal duzue 30 €ko txekea Orixa liburudendan, euskarazko produktuetan gastatzeko. Eta zergatik ari gara hau antolatzen? Berbalagunen "familia osoko" albuma osatu nahi dugulako, zuen taldeko oroigarria gorde ahal izateko eta beste taldeetako kideen aurpegiak ezagutu nahi ditugulako.

Zuetako batzuek galdetu diguzue ea bakarrak zineten Romon edo Algortan, ea zein adinetako jendea dabilen Getxoko berbalagun eta gurasolagun taldeetan. Bada, bai, jende asko gara, eta zaila denez denok leku eta ordu bakar batean geratzea, berbalagunen argazki albuma sortzea bururatu zaigu.

Otsailaren 9an egingo dugu zozketa, eta bidalitako argazkietan agertzen zaretenok parte hartu ahal izango duzue. Taldeko argazki bat baino gehiago bidali daiteke, afariren bat egiten baduzue, taberna zuloan bada, edo irteeraren batekoa bada... zuek bidali, ongi etorriak izango dira denak.

E-mailez egizugetxo@gmail.com-era bidali, eta paperean baduzue, ekarri bulegora: Aldai Patronatuan, Karitatea 1, sotoa, 10.bulegoan gaude, Algortan bertan.