egizu getxo euskaldun

Kaixo! Otsailaren 16an Aratz mendira, Araia herritik igo ginelarik, joan ginen, oraingo honetan talde handitxo bat, 16 pertsonakoa. Eguraldia ederra, eguna Naturan ematen gonbidatzen zaituztenetariko bat izan zen. Beti bezala Algortan 8:30ean, auto banaketa egin eta harantz abiatu. Araian kafetegi kuttuna aurkitu eta noski, hasi baino lehen eta indarrak hartzeko, batzuk kafesnea, beste batzuk pintxoa eta guzti, hartu genituen. Mendia luzeegia ez denean, ohitura honi ekin behar diogu, elkarrizketak sortzeko, ze gero behin mendian aldapa gora, arnasa hartzea eta hitz egitea zail gerta dakiguke, Badazpada! Gailurrera heldu baino lehen geldiatxo batzuk egin behar, erritmo desberdinak zeudelako, baina lekua aproposa, landaz beterik dagoelako. Tontorra bera harkaitzezkoa, bidetxoa markatzen, ez dago galtzerik, eta dakizuenez hor goian (1443 m.) dena hobeto dastatzen da, Ro eta Landerrek zeramaten ardoa adibidez. Jaitsi eta San Adriango tunelera joan eta etorri, erromatar errepidea ikusi eta herrira, ez ahaleginik gabe. Zeozer hartu taberna berean eta etxera. Errepikatzekoa!

Argazkiaren erdian motxila lotzen Marta Arana, gure kronikaren egilea, ea besteok ere animatzen zareten idazten!

Jardueraz jarduera gabiltza otsailean zehar, guraso eta umeekin txokolatezko kirikiñoak egin genituen hilaren 13an, Ainhoak ondo erakutsi zigun bezala.

    

Aste horretan bertan Doro Zobaran ipuin-kontalari busturiarra ere gurean izan zen, eta barruko umea ateratzen lagundu zigun. Barre ederrak entzun ziren Algorta eta Romoko kultur etxeetan.

 

Literaturarako tartea ere izan genuen, Iratze Ormatza bakioztar idazlea gonbidatu genuen. Bere lehenengo bidaia-liburuaz berba egin zigun. Hunkigarria izan zen zelan kontatu zigun kanpo eta barneko bidaia, gauzak, jendea, lekuak zelan bizi zituen, literaturak eman dezakeen indar eta bizipoza, eskerrik asko, Iratze!

    

Eta azkenik, konpartitu nahi ditugu zuekin zapatuan mendian egindako ibilbideak eta argazkiak, batzuk nahikotxo nekatu ginen baina hurrengoan ere joango gara, nola ez!

    

Iratxe Ormatzak hegoalderantza egiteko aukera ematen digu bere lehen bidaia-liburuan. Labayruk argitara eman zuen 2007ko Durangoko azokarako, eta orduan izan genuen liburuaren berri. Bizkaieraz irakur dezakezu Bakioko idazle nobelaren lana. Eguen honetan, otsailaren 14an, arrastiko 20:00etan Aldai Patronatuan lotuko gara berarekin berba egiteko. Gura baduzu bertan elkartuko gara.

Doro Zobaran Busturitik etorriko da otsailaren 12 eta 14an Getxora, ipuin kontalari honek helduentzako saio bereziak eskainiko ditu Algortako Villamonte Kultur etxean asteartean, 10:00, 17:00 eta 20:00etan; Romoko Santa Eugeniara, aldiz, ostegunean joango da goizeko 11:00etan. Saio irekiak dira eta denok zarete ongietorriak, nahiz eta guk herriko 3 euskaltegietako ikasleak modu bereziagoan gonbidatzen ditugun.

Datorren astean, hilaren hirugarrena izanda, mendira joango gara. Aratz igoko dugu zapatuan. Betiko legez Algortako Telletxeko parkinean geratuko gara 8:30ean. Etortzekoa bazara aldez aurretik abisatu telefonoz (619 935 541) edo posta elektronikoz egizugetxo@yahoo.com.

Otsailean zehar umeekin euskaraz ederto pasatzeko aukera eskaintzen digu SENDI Proiektuak, pizzak prestatu eta meriendatu gero Iñaki eta Xabirekin, dantzatu Itxas Argiako Maider eta Ixarekin, txokolatezko postre erraz eta orijinalak (ikusiko duzue ze sorpresa duen Ainhoak prest guretzat!), soinu-jostailuak Luisen eskutik, kantatu eta jolastu Bizkaiko Xirula-Mirulako Iratxe eta Krisekin, eskiatzera denok batera...

Horretaz gain animatu nahi zaituztegu, Getxoko amak eta aitak, gurasolagun izaten. Berbalagunen modura, astean behin ordubetez, euskaraz talde txikietan eta zuen umeak begirale batek ondo zainduta, ez daukazue aitzakiarik.