egizu getxo euskaldun

Urriaren 27an, zapatuan, ikasturte honetako lehenengo zita dugu Berbalagunok mendira joateko. Algortako Telletxe plazako parkinean 8:30etan geratu eta betiko moduan kotxeetan joango gara. Handik Orozkora, Ibarra, Urigoitiko bidea, Usabel eta  Belaustegiko aparkalekuraino iritsiko gara. Oinez egitekoa hauxe: Belaustegi(670m) - Austigarmin(1.020m) [35'] - Ipergorta(1.235m) [20'] - Gorosteta(1.261) [20'] - Kargaleku(1.115m) [20'] - elurzuloa [25'] - Belaustegi(670m) [40']. Mendien inguruan informazio eta argazki gehiago ikusteko web gune hau oso egokia da.



Mendira joateko irrikaz geunden eta zerrenda prestatu dugu, ez da inondik inora behin betikoa. Gida bat, hemendik aurrera hilean behin egitekoa markatzeko. Betiko moduan ekarpenetara zabalik dago.

Hauxe proposatzen duguna:
Urriaren 27an Gorosteta
Azaroaren 17an Zumaia-Deba
Abenduaren 15ean Erlo
Urtarrilaren 19an Toloño
Otsailaren 16an Aratz
Apirilaren 19an Tologorri
Maiatzaren 17an Kolitza

Gorostetarako ibilbidea Josuk proposatu du eta gidatuko du, animatu zeuk ere proposatzera!

Katixa Agirre gasteiztarraren lehen ipuin liburua proposatzen dizugu urrian zehar irakurtzeko. Uxue Alberdik bere kritikan honela dio: Zigarro bat dugu, baina sua falta zaigu. Sexu grina dugu, baina gure bikoteak ez gaitu asetzen. Eta zurrunga egiten du. Kafea hartu nahi dugu, baina ez dugu kafe-makina elektrikoa non entxufatu, edo kafeari usaina falta zaio, edo kafea perfektua da baina hura behar bezala dastatzeko konpainiarik ez dugu.

 

Irakurtzeko asmorik baduzu, animatu, urriaren 25ean aukera izango dugu berarekin egon eta horretaz berba egiteko. Algortako Villamonte kultur etxean, 20:00tan elkartuko gara Uribe Kostako Irakurzaleen Txokoa egitasmoaren eskutik.

Gurasoentzako ikastaro berezia ipiniko dugu martxan Getxon, euskaraz  jakin arren, umeei etxeko lanetan laguntzerakoan arazoak izaten dituztenenentzat. Hiztegia landu, gaiak nola azaldu, amak eta aitak trebatzean datza ikastaroa, umeen etxeko lanak ulertzen eta egiten laguntzeko.

 

Urriaren 16an hasiko da, 50 orduko ikastaroa, astearte eta ostegunetan, 10:00-11:30 edo 18:00-19:30, 40 euro, Getxoko euskaltegietan, izena eman behar da lehenbailehen. Begirale zerbitzua doan arratsaldez umeak zaintzeko gurasoak ikastaroan dauden bitartean.

Izena emateko zein informazioa jasotzeko deitu (685 73 29 63) edo idatzi (sendigetxo@yahoo.com).

:: Hurrengo orrialdea >> Azken erantzunak