egizu getxo euskaldun

Iraupen eski asteburua antolatzen ari gara, urtero moduan kirola euskaraz egin nahi dugulako. Getxotik aterako gara martxoaren 9an, arrastiko 18:00etan. Autobusez Jakara, Oroel hotelera joango gara. Zapatu eta domeka goizean Sonporteko estazioan bi orduko ikastaroa izango dugu monitore batekin, hasiberriontzat talde bat eta bestea eskarmentua dutenentzat. Pistetatik ibili, nekatu, elkarrekin afaldu eta gero Jakako alde zaharretik ibiliko gara, ez oso berandura arte ;)

Iraupen eskia egiteko gogoz bazabiltzate, badakizue, martxoaren 2ra arte epea zabalik dago izena emateko!



Iraupen eski asteburua
Prezioa: 125 € / 100 € Berbalagun zein Bizarra Lepoaneko bazkideentzat
Horren barne: autobusa, egonaldia Oroel hotelean (3 eta 4 laguneko geletan), bi goasri, zapatuko afaria, forfaitak, 2 orduko ikastaroa euskaraz egunero, ekipo osoko alokairua eta asegurua.
Izen emate epea: Martxoaren 2ra arte zabalik.
619 935 541 & 94 491 4357
egizugetxo@yahoo.com

Hirugarren zapatua iritsi eta gu, ohiko lekuan, ohiko orduan, elkartu ginen Telletxe plaza aurreko parkinean. Eguraldi ederra, zerua garbi, haizea bai, bazebilen. Getxotik Trapagaranera, hortik gora Larraineta zeharkatu, Zugastieta atzean utzi eta Peñas Negras Interpretazio Zentroaren ondoan aparkatu genuen. Kanpoan haizea, haizea eta haizea. Gure taldea maldan gora, poliki-poliki. Paseo suabea izan zen, laburra. Pico de la Cruzetik bueltan, hamaiketakoaren orduan, norberaren maniak eta barreak nagusi, oso giro ona, betiko moduan. Hurrengoan badakizu, animatu!









Argazki guztiak ikusteko sakatu hemen: http://www.flickr.com/photos/egizu/sets/72157594143800567/

Orain dela 3 aste 16 lagunek hasi genuen "Bertsolaritza 0tik hasita" ikastaroa. Bertsolaritzaren argazkia denon artean osatu eta gero Xabier Amurizarekin Ajuria tabernara, ezin hobeto hasteko modua! Handik kopla txikira pausu batean, dilin, dalan, dalan! Atzo gauean zortziko txiki "xarmegarria" destripatu genuen maitasuna zela eta. Barreak, giro ederra, potoak zein hankaluzeak barne. Josu Landeta irakasle jaunak eskusoinua ekarri zuen, "Santi mamiñe" koplak hobeto, ozenago kanta genitzan. Klase amaieran Pelloren bisita, agurren ostean berriro Ajuriara.

Hona hemen gu, ausartu zeu be! Eta bertsokideei datorren martitzena arte.

Asteburu honetan ez gara urrunera joango, ez! Meatzaldea gertu daukagu baina gutxitan ibiltzen gara hortik, horregatik erabaki genuen Zugaztietatik gora joatea. Ganeran (822) lehenengo eta hortik Pico de la Cruzera (803) iristeko ibilbidea egingo dugu, bista ederrez inguratuta, mendia, itsasoa. Hiritik oso gertu eta urrun aldi berean.



Lehengo meategiek oraindik kontatzen dituzte istorio lazgarriak, historia lazgarria, hurrengo baterako utzi beharko, azkenean ez dugu lortu bisita gidatua. Animatu zaitezte zapatu honetan, abisatu telefonoz (609 935 541) edo posta elektronikoz (egizugetxo@yahoo.com). Betiko moduan Algortako Telletxe plazako aparkalekutik aterako gara 9:00etan.

Urtarrilaren 20an, Pasai Donibane ezagutu eta berrezagutu genuen. Eguraldi paregabea, eguzkia eta tenperatura perfektoa Jaizkibelera igotzeko. Bista zoragarriak, itsasoa, harriak, labarrak, larreak, zaldiak, ardiak, Txingudiko badia, Hendaia, Irun... Paseotxua izan behar zena paseoa izan zen, giro ederrean penarik ez. Guadalupeko amaren ermitaren ondoan bazkaria eta bazkalostekoa. Hementxe Josuk egindako argazki batzuk, denak nahi dituenak eska ditzala! Zoazte hankak eta giharrak prestatzen meatzaldera joateko hile honetan.