egizu getxo euskaldun

Ikasturtea joan da eta uda hemen dugu, bete-betean. Urrian aurkezpen-merienda egin genuenetik, zenbat lagun, une on eta barre egin ditugun! Ezin aipatu jarduera guztiak taldeetan, umeekin, bertsotan, plazetan, literaturan, mendian, bizikletaz, eskiatzen, sagardotegian, bazkarietan, jaietan, bizkaieraz, Urepelen… bakoitzak izango ditu bereak eta den-denak gogoratu ahal dituzue gure flickr-eko argazkiak ikusita. Abuztuan geuk ere atseden txikia hartuko dugu indarberrituta etortzeko datorren ikasturtean, proiektu eta jarduera berri gehiagorekin. Ederto pasa uda lagunok eta gogoratu: dabilen mihiari…ez zaio goroldiorik lotzen!

Bilbo eta Laudio arteko ibilbidea egiteko asmotan abiatu ginen zazpi lagun pasa den larunbatean, ekainaren 27an hain zuzen ere. Gehienak Algortatik zetozen eta niri, Bilbon, haien zain egotea tokatu zitzaidan.

Erreportaje fotografiko zabala egin zen, Josuri esker, nahiz eta bere kamara batez ere loreak  ateratzeko prestatuta egon.





Pagasarrira ailegatu ginenean betiko atsedenaldia egin genuen energia pixka bat hartzeko, eguzkitarako krema eman, argazkiak ateratzen genituen bitartean formal-formal egonda… Ondoren Ganekogorta mendirantz abiatu ginen. Baina, Pagasarriko aldapak igo beharrean Ganekogorta inguratzea hobeto iruditu zitzaigun.





Egun ederra eduki genuen baina sargoritsua ere bai; ikaragarri eskertu genuen Ganekogorta atzean utzi izana, batez ere Felix, Agurtzane eta hirurok gure bertigoa dela eta.





Handik Laudiora abiatu ginen Gazteluzaharretik, Kamaraka ezkerretara utziz. Baina Laudiora ailegatu baino lehen bazkaltzeko gunea aukeratu genuen: Santa Luzia (Ermuko Andra Mari). Pixka bat berandu zenez janaria gogoz hartu genuen nahiz eta  ardorik ez eduki eta gure albokoek zeukaten musika zaratatsuak hango lasaitasuna apurtu. Ermita handia da eta kanpotik oso ondo apainduta dago.





Ezki baten itzalpean bazkaldu ondoren Isusi izeneko auzo dotorea zeharkatu eta Laudiora. Han edari freskagarria hartu genuen, Herriko jaiak zirenez dendak itxita zeuden eta jendea atsedenean, lasaitasuna zen nagusi. Handik hurbil Renferen tren geltokia zegoen; Bilbora ailegatu ginenean arratsaldeko zazpian ziren.





Aurtengo mendi-irteerei agur esateko, beti bezala, oso ondo pasatu dugu.

Datorren irteera arte. Ondo pasa uda!! (Eskerrik asko Rosa, kronikagatik).

 







Getxoko umeak eta gurasoak suaren inguruan dantzan ibili ziren gaur zortzi. Urtero legez, herriko hainbat elkartek arrasti pasa ederra antolatu genuen San Nikolas plazan, Algortan. Bakoitzak bere alea ekarri zuen eta denon artean jai beroa egin genuen. Eskerrak ematea besterik ez zaigu falta; ALBE bertso eskolari eta bereziki Ander, Aratz, Fermin eta Mikel bertsolari handiei; Gorrondatxe kultur elkarteari eta bertako abesbatzako kideei, baita suaren injineruei ere; Jose Antonio Agirre euskaltegiko lagun txokolatezaleei; Zabala ikastetxeko guraso elkarteko kideei, Agurtzaneri, Laurari...; Bizkaiko Xirula-Mirula elkarteko artista jatorrei; Bizarra Lepoaneko Alazne eta Itziar makillatzaileei; eta Udaleko hainbat ataletatik lagundu diguzuen guztioi. Eskerrik asko eta hurrengora arte.

Euskara showa jendea ezagutzeko jaialdia da. Getxoko udaleko immigrazio eta euskara zerbitzuek urtero antolatzen dute; bertan, abestien bidez, herriko jende gehiago ezagutzen duzu eta karaoke erraldoian parte hartzen duzu. Joan den barikuan Romon izan zen jaialdia, Algortako Kasinotik zetozenak urduri zeuden taula handian. Bana ederto joan zen dena.





Karaoke kantariez gain, artista gonbidatuak ere entzun genituen: Israel eta Jorge Pisa, Jone Diez eta Jose Heredia eta bere taldea. Datorren urterako entrenatu nahi baduzu web gune honetan aukera dago: http://euskaraoke.blogspot.com (eskerrik asko, jabi, estekagatik!)

Koadrila ederra joan ginen hilaren 13 eta 14an Arabako lautadara bizikletaz ibiltzera eta bertako txokoak ezagutzera.

Goizeko 9:00etan Fadurako aparkalekutik abiatu ginen hiru kotxetan Arabarantz, bizikletak alokatutako furgonetan generamatzala. Bi orduren buruan Barriako aterpetxean geunden; aterpetxe hau Urkilla mendilerroaren oinean dago, Gasteiztik 25 kilometrora, Zistertarren monasterio zaharra da eta egun aterpetxe bihurtu da. Bertan motxilak utzi eta logelak hartu ostean bizikletak eta kaskoa jantzita Agurainerantz atera ginen.





Batzuek bidean erabaki zuten Alegria-Dulantzi ezagutu nahi zutela eta holaxe egin zuten; besteok, ordea, Agurainerantz jo genuen. Eguzkiak gogor jotzen zuen eta egarri ginen, beraz, herri atsegin honetako terrazetan eseri, zapatak askatu eta freskagarri batzuk hartu genituen. Eskertzekoa benetan!!!





Geroago Dulantzikoak heldu ziren eta herriko plazako arkupean bazkaldu genuen, bertako herritar batzuek guregana hurbildu ziren bitartean: goxoa egiatan etxean sukaldatutakoa... Bazkalostean, kafetxoa herriko tabernan eta lo-kuluxka egin genuen eliza ondoko belardi batean, lasaigarria hau ere zinez!!!





Indarrak berreskuratutakoan, Barriarantz abiatu ginen. Konturatu zarete Arabako lautada zein xarmangarria den, ezta?... Dutxara!!!, hura bai gozamena gero!!! Eta segituan afaltzera… Menua: purea eta bakailaoa eta postrea… Dena oso zaporetsua…





Afalondoko tertulia barregarria eduki genuen: han ibili ziren Leire eta Monika norgehiagoka, zein baino zein hobeto arituz txiste kontaketan… Asierrek ere bereak bota zituen… Hurrengo egunean, igandean, Zalduondon, Zeledonen herrian, hamaiketakoa hartuta La Lezera joan ginen -bidean zaldi eder batzuekin solasalditxoa izan genuen- eta bertan hatzarte ikusgarria bisitatu ondoren, ondoko baserri batera joan ginen Idiazabalgo labeleko gazta erostera, latxa ardi esne gordinez egina berau. Arabako haizea sakonki arnastu genuen.





Handik buelta Zalduondora bertako jaiak baitziren eta, nola ez, “kañatxu” bat hartu behar, musika entzun, dantza gutxi –nekea, badakizue- eta aterperantz abiatu ginen. Dutxa hartu, motxilak eta bizikletak jaso eta batzuk Getxorantz, eta beste batzuk Barakaldo eta Sestaorantz!

Zubileta ikastetxeko umeek eta zenbait gurasok asteburua Barrian igaro eta gero autobusa hartu eta herrirantz haiek ere. Asteburu aparta pasatu genuen, jende jatorra eta giro hobezina!!!
 
Izaskunen gogoeta 2009-06-20, 21:05