agonirena

Gure umeak Eskola Publikoan ikasten dute. Kurtso hasierako batzarrak izan ditugu aste honetan. Orain arte egin den bezala, batzar hauetan, txosten bat eman digute eta irakasleak txosten hau azaldu digu, bai euskara eta bai gaztelera txandaka erabiliz. Txostena hizkuntza bitan idatzia dagoenez, irakaslea euskaraz ari denean, erdaldunek txostena irakurtzea besterik ez dute azaldutakoa ulertzeko.
Pentsa daiteke, D eredua bakarra den ikastetxe honetan, guraso batzarretan erdaldunak gutxiengoa izan arren batzuetan, haien hizkuntza eskubideak ondo baino hobeto babesturik daudela.
Azken batzarrean, irakasleak gaztelera hutsean eman zituen azalpen guztiak. Hainbat bider bizitako egoera errepikatu zen: lehen agurra euskaraz, denon ulermenaren mesedetan gaztelera lehenetsi eta batzarra euskaraz despeditu. Eta hau eskola euskaldun batean gertatu da, irakasle euskaldun bat eta gehiengoa euskalduna den guraso talde batek egindako batzar batean.
Berriz ere, ustez eztabaidarik onartzen ez duten euskaldunon hizkuntza eskubideak urraturik. Eta horrelako jokabideak saihestu ezean, aurrekari bihurtzeko arriskua izaten dute. Egun hauetan hitzetik hortzera dabilen Keith Johnsonen artikulua datorkit burura. Horrelakoak hontzat ematen baditugu, Johnson jaunak arrazoi izango du, hots, hizkuntza ezgauza dela gurea, eguneroko jardunerako balio ez duena.

E-posta mezu bat erantzutean, batzuetan, nire euskaldunak atzemateko makina martxan jartzen da. Igorle ezezaguna euskalduna den jakiteko datuak ebaluatuatzen hasten naiz:
Soraluzeko enpresa bateko langilea...
Aitor Rodriguez Cabrejas... ummm, izen euskalduna eta erdal abizenak
Egun on... Mezuaren agurra euskaraz
Mezuaren gorputza gazteleraz...
Enpresaren euskara batzordeak ala gomendatuta edo euskara lantokian ezartzeko planaren biktimaren bat ez mintzeko, erantzuna hizkuntza bitara egitea erabaki dut. Politikoki zuzena den bezala, euskara hobetsi, eta aitorren hizkuntza erabili dut lehenik. Ondoren, edukia berbera gazteleraz idatzi dut.
Mezua bidali eta gutxira jaso dut erantzuna:

Eskerrik asko ander

-------------------

Gracias, Ander.

Hau jilipitxi parea!
Hemendik aurrera, euskaldunak atzemateko makina itzali eta bazterrean utzi behar dut, gehiegi garatu dut sen berezi hau, beti aurrean dagoenaren hizkuntza garaile. Akabo!

Y este es el último aviso.

Abuztua amaitu da eta oporrak ere atzean utzi ditut jada. Mezu honekin abuztuan jazotakoari gainbegirada bat  eman eta kurtso berri honen erronkak azaldu nahi nizkizueke.
Ehun urte bete eta aste gutxitara hil zen gure aittune Migel. Lotan harrapatu zuen heriotzak, eta bizi izan zen bezala zendu zen: lasai.
Oporrak, Leon eta Asturias inguruan pasatu ditugu. Leonen dagoen Bierzo ingurua da gehien gustatu zaigun parajea, ardo ikusgarriak eta probatzeko aukerarik izan ez genuen botilloa. Done jakue bidearen kutsua du denak, eraikuntza zibil eta erlijioso ikusgarriak, erromesak nonahi. Leku pare bat aipatzekotan, Villafranca del Bierzo eta "Las Medulas". Herri polita lehendabizikoa eta erromatarrek ustiatutako urre meatzeak bigarrena. Bidaia honek ere eman zigun "nola letxe / zergatik etorri gara hona arte" esateko aukera... Ancares ingurua ezagutzera joan ginen, Campo del agua izen duen herri batera. Bertan, lau txabola edo "palloza" eta ia furgoneta bertan utzi genuen 12 kilometrotako mando-bide batean.

Urtarrileko new years resolutions direlakoak irailera aurreratu ditut nik:

• EGA atera nahian nabil. Ia egokitzen zaidan ordutegirik aurkitzen dudan euskaltegian
• jboss-jbpm delako prozesu kudeatzailea ezagutu beharra dut enpresa bateko eskaera-fabrikazio-bidalketa prozesua kudeatzeko. Liburua ere erosi dut: Business Process Management with JBoss jBPM
  
• Azken egun hauetako aurkikuntza izan den symfony plataforma ezagutu. Agian lanean darabilgun mahai gaineko aplikazioren bat plataforma berri honetan garatzen saiatuko naiz.
• OpenStreetMap proiektuan, Etxarri, Abadiño eta Durango inguruko bideak osatu
• Pisua jaitsi, kirola egin... Datorren hilabetean spining klaseekin jarraituko dut :-)
  

Beno ba, blogari berriz ere martxa hartzeko zerbait behar nuen. Mezu honekin zabaltzen dut kurtso-urte berria!

Lanez lepo nabilenean, erabiltzaile batzuk egiten dituzten galderak nire onetatik ateratzen naute. Azken 10 urte hauetan Microsoft Office egunero erabiltzen duen erabiltzaile batek galdetutakoa: "testu bati tamaina jakin bat ezartzen diodanean bere estiloa aldatzen da... zergatik da hau?". Pasadizo honen inguruan honako gogoeta hauek egiten ditut.

1. Microsoft Office moduko aplikazio hauek ez dute inondik inora erabiltzailearen trebezia mailaren garapen egoki bat bermatzen. Gauzak di-da batean egin daitezke, helburua itxura on bat lortzea da, eta berdin dio gauzak nola egiten diren. Gauzak txukun, modu estrukturatu batean egin daitezke, baina aplikazioak ez du erabiltzailea zentzu honetan bideratzen.
2. Gauzak di-da batean egin daitezkenez, inori ez zaio bururatzen eskuliburuak egiteko, langileak erabili behar duten testu editorearen inguruan inongo formakuntzarik behar duenik. Norbaitek ezagutzen ahal du CAD aplikazio bat aukeratu eta inongo formakuntzarik aurreikusi ez duen bulego teknikorik?
3. Urteak dira enpresan erabiltzen den eskuliburuak kudeatzeko aplikazio bat egin nuela. Aplikazioak izan dituen arazoen ehuneko laurogeita hamarra Officek sortu ditu.
   

Aplikazioa berritzeko aukera banu, beste bide bat hartuko nuke. LaTeX moduko sistema bat erabiliko nuke eskuliburu iturri bezala.

• LaTeX fitxategiak ASCII fitxategi simpleak dira. Hau baino formatu iraunkorragorik ez dago, orain hogei urte irakurrri zitekeen eta hogei urte barru ere irakurtzeko modua izango dugu. Nor ausartuko litzateke WordPerfect 2.20 erabiliz sortutako dokumentua gaur egun berreskuratzen?
• Web garapenean ematen den bezala XTHML eta CSSekin, edukia eta estiloa bereizi egiten dira. Dokumentua idazterakoan edukiari erreparatzen zaio. Markaketa bidez estruktura bat ezartzen da eta azkenik, estilo jakin bat erabiliz emaitza lortzen da (PDF, Word, PS, HTML, ...). What is LaTeX and why you should care
• Office dokumentuak eraldatzeko COM interfaze, OLE, VBA eta horrelakoak erabili behar izan ditut. Zin dagizuet ez dela munduko gauzik atseginena... aukeran, COBOL nahiago dut. LaTeX iturriak ordea, ASCII fitxategi simpleak direnez, mila modutara atzitu eta landu daitezke, edozein programazio lengoaiekin.
• Azkenik, LaTeX dokumentuak kudeatzeko software libre andana dago eskuragarri, eta hau idazten duenari, honek "jarri" egiten dio.
  

Berriki, taula batean datuak erakusten dituen mahaigaineko Java aplikazio bat garatu dut. Aplikazio honek erakusten dituen datuetan, zenbaki eta datak aurkitu ditzakegu, eta jakina, datak ez dira berdin idazten ingelera, frantsesez, gazteleraz edo euskaraz. Hizkuntza edo kulturarekin zer ikusia duten datuak kudeatzeko, Javak objektu batzuk eskaintzen dizkigu (DateFormat, NumberFormat, ...). Horrela, data, zenbaki edo monetak bistaratzeko orduan, Javak, hizkuntza jakin bati dagokion formatua eskaini dezake. Zeintzu hizkuntza ezagutzen ditu sunek eskaintzen duen Javaren 1.6 inplementazioak?

Locale list[] = DateFormat.getAvailableLocales();
for (Locale aLocale : list) {
    System.out.println(aLocale + "\t" + aLocale.getDgetDisplayName());
}

emaitzaren lehen lerroak:

ja_JP    Japanese (Japan)
es_PE    Spanish (Peru)
en    English
ja_JP_JP    Japanese (Japan,JP)
es_PA    Spanish (Panama)
sr_BA    Serbian (Bosnia and Herzegovina)
mk    Macedonian
es_GT    Spanish (Guatemala)
...

Eta horrela 150 hizkuntza-herri-bariazio, Katalana barne. Eta euskara? Ba ez, ez dago zerrenda honetan. Baina, ba dago Javari euskara irakasteko modurik: "Locale Sensitive Services SPI" direlakoak erabiliz. Laburrean: data eta orduak euskaraz adierazten irakatsi beharko diogu Javari, horretarako, klase abstraktu jakin batzu erabili beharko ditugu, JAR fitxategi bat sortu eta gure Java instalazioan txertatu beharko dugu sorturiko JAR hau. Honako helbide honetan aurkitu dut jakin beharrezkoa: http://www.jtute.com/java6/0702.html

Betiko galderak datozkit burura... Zergatik ez dugu informazio teknologietan euskararen presentzia kudeatu eta sustatuko duen erakunde edo lan talderen bat?, gure izakeran ote dago norbera bere aldetik ibiltze hau?. Agian nire ezjakitasunaren  ondorio izango dira aurreko galdera hauek, baina tira, etorri zaizkidan bezala idatzi ditut.


PS: Norbaitek iturburu fitxategiak nahi balitu, lasai eskatu. Hori bai, data eta orduen euskaraketan fidagarritasun edo zuzentasun handirik ez espero...

Historia hau lagun batek luzatutako galdera batekin hasten da: Bezero batek formatu arraro batean dituen datuak irakurri, eta mysql moduko datubase batera mugitu nahi nituzke... Laurogeiko hamarkadan eginiko aplikazio batek kudeatutako datuak dira eta ziur aski COBOL aplikazio bat izango da...
Horrela hasten da festa. Horrela hasten dira ordu txikietako saioak, hau begiratu, bestea instalatu, hori irakurri, bestea frogatu... Erronka klase hauek izugarri atsegin ditut, hau bai da nire afizio eta pasioa.
COBOLi buruz zereozer gehiago jakiteko aukera izan dut. Jada desagertua zegoelakoan nengoen ni, baina ez da hau egoera inondik inora, 1997an, Gartner Groupek eginiko txosten batek zioen, munduko negozioen kudeaketa ehuneko larogei batean COBOLen oinarriturik dagoela.
1959an sortua, datu kudeaketa du xede. Txartel zulatuak erabiltzen zirenez garai haietan euskarri moduan, programazio langoaia honetan idatzitako aplikazioetan, lehen zazpi zutabeak "zuri" mantendu behar dira.
Hau litzateke COBOL-en idatzitako oinarrizko "Hello World" moduko aplikazioa
       IDENTIFICATION DIVISION.
       PROGRAM-ID. HELLO-WORLD.
       PROCEDURE DIVISION.
       PARA-1.
           DISPLAY "Kaixo, mundu!.".
           STOP RUN.
Nire lagunaren datuak irakurtzeko COBOL pixka bat ikasi eta aplikazio txiki bat egin nuen. Lehen aukera, software libreak eskaintzen duen COBOL konpiladorea: OpenCOBOL. Ubuntu distribuzio batean istalatu, aplikazioa konpilatu eta... kaka. COBOL konpiladore ezberdinak sortu zituzten enpresek, datu formatu ezberdinak erabiltzen zituzten :-( eta ez dago OpenCOBOLekin gure datu fitxategiak duen formatua irakurtzerik.
Hurrengo pausua: datu fitxategiaren formatua zein den jakitea. Aplikazioen egileak MS-COBOL 3.1 erabili zuela aitortu zuen, eta aplikazio horri buruz bere ahotik aterako ziren azken hitzak hauexek izango zirela. Oraingoan ere, Microsoft tartean! Ba bai, bai jauna, Microsoftek Micro Focusek eginiko COBOL aplikazio hau eskeini zuen 1992 urtera arte. Microsoften konpiladore hau sei disketetan eskaintzen da, garai bateko hiru pulgada eta erdiko disketetan. Eta jakina, DOS sistema eragile baten gainean erabili daiteke bakarrik. Berriz ere software librea erreskatera: Ubuntu distribuzioan VirtualBox birtualizazio softwarea instalatu eta FreeDOS sistema eragilea bertan abiarazi :-). Disketak fisikoki grabatu beharrean, imaginak sortu nituen eta hauek montatu nituen.
FreeDOSen gainean istalatutako Micro Focus konpiladoreak ederki egin zuen bere lana! Datu base bitar indexatu bat C-ISAM formatura eraldatzea lortu nuen, registro bakoitza lerro batean, eta eremu guztiak luzeera berarekin, kalkulu orri batek erraz asko onar dezakeen formatua.
Micro Focusek, egun, Net Express izena duen COBOL garapen IDE bat eskaintzen du. Mandoa martxan jarri, ikastetxeentzat eskaintzen den bertsio bat lortu eta berau erabiliz ere dena primeran joan zen.

Hurrengo "a que no..." horietako bat proposatu arte, lo ordu gehiago egingo ditut behintzat!

Gaur, gure txikia eskolan arrantza batean utzi dut . Aitatxokin! zioen garrasi batean, harrera gelako zaintzaileak, tiraka, gelan barrura sartzen zuen bitartean. Hontara ez da bat sekula santan ohitzen. Zulo ilun bat sortzen zait barrualdean, den-dena xurgatzen duen iluntasun bat.:-@
Saiatu naiz azaltzen, "Aitak lan egin behar du, ezin dut zurekin gelditu...", baina alferrik, ez du ezer ulertu. Aitatxo! esaten zuten begi bustiek ez zuten azalpenik eskatzen.
Makinak martxan jarraitu dezan, bakoitza bere lekura: umeak eskoletan, helduok lanean.
Lanera bidean Delirium tremens buruan

Boga boga...
itsasorantz dijoaz
kresala azalean
haizea aurpegian
duintasuna
itsasoan galduta
egun bat eta
beste bat eta
beste bat
itsasoa ta zerua ikusten.

Arratsaldean, irakaslea galdetu eta umea primeran egon dela esan du. Betiko moduan...

Laguntza eske natorkizue oraingoan. Arazoa zein den azaltzeko, adibide erreal bat jarriko dizuet

Aplikazio informatiko bat garatzen dugunean, hainbat zerbitzu erabiltzen ditugu aplikazio horren ezaugarriak gauzatzeko. Adibidez, aplikazio sarrera baimentzeko, LDAP direktorio zerbitzua erabili dezakegu, datuak datu-base zerbitzari batean gorde edo txostenak cocoon bezalako framework batean sortu. Zerbitzu ezberdin hauek makina ezberdinetan egoten dira, eta makina hauetako bakoitzak, guk erabiltzen ditugun zerbitzuetaz gain, beste zerbitzu batzuk ere eskaintzen dituzte.

Demagun, azpiegitura informatiko honen arduradunak, zerbitzari jakin batean lanen bat egiteko premia duela eta horren ondorioz, makina honek eskaintzen dituen zerbitzuak desgaituta egongo direla. Sistema arduraduna dator zuregana eta hauxe galdetzen dizu: Zer gertatuko da X makina itzaltzen ba dut?.
Azpiegitura txikia denean, galdera honek ez luke zentzu handirik izango, baina, aplikazio mordoa martxan dagoenean, aplikazio bakoitza pertsona ezberdinen ardurapean dagoenean... ez da hain erreza.

Enpresan dugun azpiegituran ematen diren erlazio edo mendekotasun hauek kudeatzeko software baten bila nabil. Nahiz eta Google-kin jotake aritu, ez dut ezertxo ere aurkitzen. Funtsean, zerbitzari, zerbitzu eta aplikazioen arteko harremanak grafikatu nahi nituzke, sistemetako arduradunak, dida batean jakin dezan, zein ondorio izan dezakeen makina jakin batean egin daitekeen ekintza batek.

Nahiago nuke software askean oinarrituriko softwarea balitz, eta langileok, elkarlanean diagrama hau osatzeko aukera eskaeiniko balu, hobe (badakizue, 2.0 kutsuarekin)!
Gustokorik aurkitu ezean, lan orduz kanpo, web aplikazio txiki bat egiteko asmoa dut. Norbaitek interesik balu, ongietorriak izango dira elkarlan eskaintza guztiak!
 
2007.01.23 eguneraketa: Lehen biktima: phpMyInventory

Ur eskasia dela eta, ur erabilpena murrizten hasi dira han eta hemen. Gure lantokian, lankide batek, argazkian ageri den bezela, bridak jarri ditu mutilen komunetan egoten diren sakagailuetan. Botoia sakatzean, bridak, botoiaren ibilbidea asko laburtzen du eta ondorioz, ur gutxiago askatzen da sakatze bakoitzean.
    
Nork du ideia original gehiago?

Opor bidaiak ordaintzeko orduan, bidai agentzia batzuek, banketxe jakin batekin itzartutako "visa" moduko txartelak eskaintzen dituzte. Bidaiak ordaintzeko abantaila batzuk eskaintzen dituzte holako txartelak: bidai prezioaren beherapena edo txartelarekin eginiko erosketen ehuneko bat hurrengo bidai baterako deskontu gisa erabiltzea.

Horrelako txartel bat eskuratzeko asmoarekin, Elgoibarko BBVA-ren sukurtsalera abiatu nintzen. Ez da ohikoa nik telebistan ikusten ditudan iragarkiak gogoratzea, baina oraingoan, BBVA-ren spot batzutan ikusitakoak eta entzundako leloak nituen buruan... Adelante dio iragarkiak, zure (gure egiten ditugun) proiektuak bideratzen saiatuko gara, eta abar. Banketxe honekin harreman komertzialik izan ezean, iragarkiak nituen BBVA-rekiko erreferentzia bakarra.

Bulegora sartu eta zuzenean mostradore atzealdean zegoen morroiari nire asmoen berri eman nion:

- Nik: Egun on

- Berak: Buenos dias

- Nik: Quisiera ....

Azalpenak eman ondoren, "vaya coñazo me estás dando, mejor si me dejas en paz" zioen aurpegi batekin, bulegoko mahai batean zegoen andereño batengana joateko esan zidan.

Morroi honek, segundu bakarrean, BBVA-rekiko nuen aurretiko jarrera baikorra mila zatitan lehertarazi zuen. Zenbat diru inbertituko zituen BBVA-k iragarkietan? batek daki!. Publizitate teknika moderno guziak alde batetik eta gizakia gizakia denetik bere dituen jarrera, enpatia eta adeitasunak beste alde batetik. Ba ahal du banketxe batek bigarren honetan inbertitzerik?

"Adelante" egiteko gogoak uxatu zizkidaten eta sartutako bidetik atzera egin nuen.