Ezpeletako Euskararen Aste arrakastatsuaren ondoren, azaroaren 12tik 18ra ospatuko den ‘Mintza euskaraz! Bai Euskarari Azkainen’ egitasmoa aurkeztu dute gaur Bai Euskarari Akordioaren jarraipen taldeko eta Azkaingo Herriko Etxeko ordezkariek. “Azkaindar guztiak euskaraz mintzatzera animatu nahi ditugu!”, adierazi dute aurkezpenean. Azkaingo karriketan euskara entzutea eta hitz egitea da egitasmoaren helburua. Jarraipen taldeko Graxi Solorzanok azaldu duen bezala: “jolas baten moduan, bederen aste batez euskaraz mintzatzeko indar bat egin dezaten nahi dugu”.

43 izan dira Azkainen Bai Euskarari Ziurtagiria eskuratu duten enpresa, elkarte, saltegi eta era guztietako erakundeak. Hauetatik gehienek euren engaiamendua berritu dute, baina 6 erakunde berrik ere proiektuarekin bat egitea erabaki dute aurten. Duela 2 urte sartu zen Azkaingo herria ‘Bai Euskarari Akordioa Herrietan’ egitasmoan eta denbora epe labur honetan proiektu anitz jarri dituzte martxan, marrazki lehiaketa eta Bai Euskarari zozketa besteak beste. “Oraindik hasiberriak zarete, baina espero dugu orain arte bezain ongi jarraitzea”, zoriondu ditu Kontseiluko idazkari nagusiak, Xabier Mendigurenek.