Merkatari eta tabernari ugarik parte hartzen dute Aguraingo Bai Euskarari Akordioan. Akordio honen bidez, hartutako konpromisoak betetzeko beharrezkoak diren zerbitzu, laguntza eta informazioa euren esku jartzen da. Horrela, euskara ikastaro berezia eskainiko diete berriro ere bertako merkatari eta tabernariei, Aguraingo Udalaren laguntzarekin.

Iaz 60 orduko ikastaroa antolatu zuten eta aurten jarraipena emango diote 130 orduko beste ikastaro batekin. Helburua da denda eta jatetxeetako langileek euskara ikasteko lehendabiziko urratsak ematea, aurrerago euskaraz zerbitzatzera iristeko. Horrela, gai izango dira, besteak beste, bezeroak agurtu, bezeroen eskariak ulertu eta oinarrizko elkarrizketetan euskaraz erantzuteko.

Ikastaro honetan euskararen lehen oinarriak emateaz gain, denda eta tabernetan oinarri-oinarrizko komunikazioa landuko da. Ikastaro hauetako ikasleek ulermena garatuko dute batez ere. Bezeroek euskaraz egindako eskari errazak ulertzea da xedea, edota ulertzeko zailtasunak izatean, ikaslea bezeroari eskaria polikiago egiteko eskatzeko gai izatea. Ulermenerako hiztegiaren ezagutza funtsezkoa da, eta horrexegatik eskaintzen zaio ikastaro hauetan garrantzi berezia denda eta tabernetako hiztegiari. Baina ikasleek, ulermena garatzeaz gain, elkarrizketa sinpleetan parte hartzen ere ikasiko dute.